मौसमी रुघाखोकीका बिरामी बढे

केही दिनयता अस्पतालमा मौसमी रुघाखोकीका बिरामी बढेका छन् । अस्पतालमा उपचार गर्न आउनेमध्ये ८० प्रतिशत बिरामीमा मौसमी रुघाखोकी र ज्वरोको समस्या हुने गरेको छ । शुक्रराज ट्रपिकल तथा सरुवारोग अस्पतालका डा. शेरबहादुर पुनका अनुसार कम्तीमा पनि दैनिक २० जना रुघाखोकी र ज्वरोका बिरामी भर्ना हुने गरेका छन् । तिहारयता उपत्यकामा मौसमी रुघाखोकीसँगै इन्फ्लुएन्जा एचवान एनवान फाट्टफुट्ट देखा परेको छ । मौसम बदलीको समयमा रुघाखोकीका बिरामी देखिने गर्छन् ।

एचवान एनवानसँग मिल्दोजुल्दो
पुनका अनुसार अधिकांश बिरामीमा इन्फ्लुएन्जा एचवान एनवानसँग मिल्दोजुल्दो लक्षण देखिने गरेको छ । ‘इन्फ्लुएन्जा ए, बी र सी गरी तीन प्रकार हुन्छन् । तर, तीनवटाको लक्षण भने एउटै हुन्छ’ डा. पुनले भने रुघाखोकी, ज्वरो आउँनासाथ इन्फ्लुएन्जा हो-होइन भनेर परीक्षण गरिँदैन । तर, इन्फ्लुएन्जा एचवान एनवान हुने सम्भावना भने धेरै हुन्छ ।’

रुघाले मात्रै ज्वरो र खोकी लाग्दैन
अहिले अधिकाश मानिसमा हाछ्यु आउने, नाकबाट पानी बग्ने, ज्वरो आउने, खोकी लाग्ने समस्या रहेको पुन बताउँछन् । ‘अत्यधिक खोकी लाग्ने, ज्वरो आउने समस्या सामान्य रुघाले मात्रै हुँदैन । टेकु अस्पतालमा मात्रै कम्तीमा दैनिक २० जना रुघा, खोकीका बिरामी आउने गरेका छन्,’ पुनले भने, ‘त्यसमध्ये केहीमा एचवान एनवान देखिएको छ ।’ १००.४ डिग्री फेरन हाईट ज्वरो आए, घाँटी दुख्ने, श्वास फेर्न समस्या हुने र ५ दिनसम्म निरन्तर ज्वरो आए यस्तो अवस्थामा एचवान एनवान परीक्षण गर्नुपर्ने पुनको भनाइ छ ।

चिकित्सकको सुझाब

डा. पुनले अहिले पनि मौसमी रुघा, खोकी एचवान एनवान देखिएको भन्दै स्वास्थ्यमा ख्याल गर्न आग्रह गरेका छन् । रुघा, खोकी र ज्वरो आएको अवस्थालाई सामान्य रूपमा लिन नहुने उनको सुझाब छ । ‘एकदम बढी ज्वरो आए, खोकी लाग्ने सँगसँगै श्वासप्रश्वासमा समस्या भए तुरुन्त चिकित्सकलाई देखाउनुपर्छ,’ उनले भने, ‘बिरामीलाई १०० डिग्रीभन्दा कम ज्वरो भए आत्तिनुपर्दैन । घरमै बसेर झोलिलो खानेकुरा खाँदा हुन्छ ।’

(नँया पत्रिकाबाट साभार)