स्वास्थ्यकर्मीको अभावले बिरामी मर्कामा

भीमदत्तनगर, १२ बैशाखः कञ्चनपुरको भीमदत्तनगर स्थित महाकाली अञ्चल अस्पतालमा आउने बिरामीको उपचारभन्दा पनि रिफर गर्ने अस्पतालको उपाधि पाउन थालेको अञ्चल अस्पतालले दरबन्दी अनुसारको चिकित्सक पाएको छैन ।
केन्द्रले जति नै सिंहदरबारको अधिकार गाउँमा आएको चर्चा गरेपनि यस्ता अञ्चल अस्पतालहरुको अवस्थामा भने कुनै सुधार भएको देखिदैन ।
पर्याप्त भौतिक संरचना भएको अस्पतालमा चिकित्सक एवं स्वास्थ्यकर्मीको अभावकै कारण महाकाली अञ्चल अस्पतालबाट बिरामीले गतिलो उपचार पाउन सकेका छैनन ।
बेलाबखतमा हुने गरेका अस्पतालभित्रका लापरबाही लगायतका घटनाले बिरामी पक्ष र अस्पताल प्रशासन बीचको तीक्तताले प्रचारबाजी पाउँदा अन्यत्रबाट चिकित्सक यहाँ आउन समेत नमान्ने गरेको कार्यरत कर्मचारी बताउनु हुन्छ ।
महाकाली अञ्चल अस्पतालका प्रवक्ता केशव अवस्थीले अस्पतालमा २८ जना चिकित्सकको दरबन्दी रहे पनि हाल दश जना मात्रै कार्यरत रहेको बताउनुभयो । उहाँले चिकित्सक कञ्चनपुर सुगम जिल्ला भएका कारण आउन नचाहने गरेको बताउनुभयो । दुर्गम जिल्ला भएको भए चिकित्सक बस्थे होला भन्नुहुदै प्रवक्ता अवस्थीले सबै पूर्वाधार र व्यवस्थापन भए पनि चिकित्सक ल्याउन नसकिएको बताउनुभयो ।
दैनिक १ सयदेखि १५० जना बिरामी सेवाका लागि अस्पताल आउने गरेका छन् । अस्पतालमा स्त्रीरोग, हाडजोर्नी र जर्नल फिजिसियन गरी तीन जना विशेषज्ञ चिकित्सक कार्यरत रहेका छन् ।
केही समय अघि अस्पतालमा जडान गरिएको आइसियु सेवा समेत दक्ष जनशक्तिकै कारण थला परेको छ । अस्पतालले सामाजिक सेवा इकाइबाट अति विपन्न र गरीब परिवारका सेवा लिन पाउने बिरामीलाई दिने औषधि समेत तीन महिनादेखि पूर्ति हुन नसकेको अस्पताल स्रोतले जनाएको छ ।
अस्पतालको अवस्था बुझ्न आउने धेरै स्वास्थ्य मन्त्री र सम्बन्धित निकायका उच्च तहका पदाधिकारीले अस्पतालको स्तरोन्नति गरिने आश्वासन दिने गरेको भए पनि अस्पतालले सामान्य बाहेकका सेवा अझै उपलब्ध गराउन सकिरहेको छैन ।
सामान्य बाहेक अन्य बिरामी सीमावर्ती भारतीय बजारका अस्पतालसँगै धनगढी, कोहलपुर, नेपालगन्जका साथै काठमाडौँसम्म उपचारका लागि धाउनुपर्ने बाध्यता हट्न नसकेको प्रवक्ता अवस्थी बताउनुहुन्छ ।
अस्पतालबाट वितरण हुने औषधि समेत अभाव रहेको बताउँदै प्रवक्ता अवस्थीले औषधिका लागि माग फारम भरेर धनगढी पठाइएको जानकारी दिनुभयो । स्थानीय तहको निर्वाचन देखि प्रतिनिधि सभाको निर्वाचनसम्म उम्मेदवार रहेका राजनीतिक दलका नेताहरुले अस्पतालको सुधार निर्वाचन प्रचारको एजेण्डा बनाए पनि निर्वाचनपछि नेताहरुको ध्यान त्यहाँ जान सकेको छैन ।
(रासस)