दाङमा घुम्ती शिविर–एक हजार बढीले पाए सेवा

दाङ, १ असारः दाङका स्थानीय बासिन्दाले घर आँगनमै सबै किसिमका सेवा पाउँदा खुशी व्यक्त गरेका छन् । जिल्ला प्रशासन कार्यालय दाङले जेठ ३० मा शान्तिनगर गाउँपालिकामा एकदिने एकीकृत घुम्ती शिविर आयोजना गरेर सेवा दिएको हो ।
गाउँपालिकाका नागरिकलाई घरदैलोमा सेवा दिने उद्देश्यले शिविरको आयोजना गरिएको प्रमुख जिल्ला अधिकारी गजेन्द्र बहादुर श्रेष्ठले जानकारी दिनुभयो । गाउँपालिकाका अध्यक्ष कमानसिंह डाँगीले जनतालाई सहज सेवा दिन यो घुम्ती शिविर आयोजना गरिएको बताउँदै आगामी दिनमा पनि यस्ता कार्यक्रमलाई निरन्तरता दिइने वचन बद्धता प्रकट गर्नुभयो । केही दिन पहिले झाडापखाला प्रभावित सो गाउँपालिकामा जेठ ३० मा पुनः सेवा दिइएको हो ।
घुम्ती शिविरमा सिटी अस्पतालका मुटु तथा पेट रोग विशेषज्ञ डा साहिल भुसाल, डा रक्षा सापकोटा र डा प्रमोद भट्टसहित गाउँपालिकाका स्वास्थ्यकर्मीले स्वास्थ्य जाँच गरेका थिए । चिकित्सक टोलीले २७८ जनाको स्वास्थ्य परीक्षण गरेको थियो । नागरिकता वितरण, विभिन्न बीउबिजन वितरणदेखि जिल्ला प्रशासन र विभिन्न कार्यालयले दिने सेवा सबै सेवा स्थानीयले एउटै थलोबाट पाएका थिए ।
जिल्ला प्रशासन र इलाका प्रशासन कार्यालय तुलसीपुरबाट गएको टोलीले ७४ जनालाई नागरिकता प्रमाणपत्र प्रदान गरेको इलाका प्रशासन कार्यालयका सूचना अधिकारी यादव भुसालले बताउनुभयो ।
शिविरमा कृषि सम्बन्धी सेवा २५० जना र पशुसम्बन्धी ३१२ जना प्रदान गरिएको थियो भने ५० जना जेष्ठ नागरिकलाई परिचयपत्र वितरण गरिएको थियो । शिविरमा नेपाल नेत्रज्योति संघ राप्ती आँखा अस्पतालले २८५ जनाको आँखा जाँच गरेको अस्पतालका नेत्रसहायक रोहित कठायतले जानकारी दिनुभयो । यसमध्ये २८ जनामा मोतीबिन्दुको समस्या देखिएको थियो । उनीहरुको राप्ती आँखा अस्पतालले बिहीबार अस्पतालमा निःशुल्क शल्यक्रिया गर्ने व्यवस्था मिलाइएको अस्पतालका प्रशासकीय सहायक जसराज विश्वकर्माले बताउनुभयो ।
रासस