हेल्थ टुडे,
काठमाडौं, ८ माघ : हरेक दुई वर्षमा राजधानीको भृकुटीमण्डपमा आयोजना हुदै आइरहेको औषधी, औषधी उत्पादनमा प्रयोग हुने प्रविधि, ल्याव, मेसिनहरु र स्वास्थ्य संस्थाहरुको प्रदर्शनी ‘नेपाल फर्मा एण्ड हेल्थ एक्स्पो २०१९ ’ यो वर्ष चितवनमा हुने भएको छ । मरणोपरान्त अंगदानको लागि समाजिक अभियान सहित नेपाल औषधि उत्पादक संघको आयोजनामा हुने उक्त एक्स्पो फागुन १७ देखि १९ सम्म चितवन एक्स्पो सेन्टरमा सञ्चालन हुने छ । मंगलबार राजधानीमा आयोजना गरिएको पत्रकार सम्मेलनमा नेपाल औषधि उत्पादक संघका महासचिव प्रज्ज्वलजंग पाण्डेले एक्स्पोमा स्वदेशी र विदेशी औषधी कम्पनी, उपकरण, ल्याव, प्रविधि र निजी अस्पतालहरु गरि दुई सय वटा स्टल रहने जानकारी दिएका छन् । फर्मा एक्स्पोमा पहिलो पटक निजी क्षेत्रका १० वटा अस्पतालहरुले पनि सहभागिता जनाउने महासचिव पाण्डेले बताए ।
संघका अध्यक्ष दीपक दाहालले नेपालमा ५३ वटा औषधी उद्योगहरुले औषधी उत्पादन गरिरहेको र ३० वटा नयाँ स्थापनाको प्रकृयामा रहेको जानकारी दिदै स्वदेशी औषधि उद्योग र प्रविधिलाई प्रोत्साहन गरि बजारिकरण गर्न एक्स्पो आयोजना गर्न लागिएको बताए । यस वर्ष आयोजना हुने एक्स्पोमा ब्रेन डेथ सम्बन्धी जनचेतना जगाउने अभियान समेतसँगै सञ्चालन गरेर समाजिक उत्तरदायित्व समेत बहन गर्न लागेको दाहालले जानकारी दिए । उनले भने, ‘ ब्रेन डेथ सम्बन्धी कानून बनेपछि ब्रेन डेथ भएका व्यक्तिका परिवारले मरणोपरान्त अंग दान गर्न नमान्ने प्रवृति व्याप्त भएकाले जनचेतना जगाउन संघले यो अभियान पनि सँगै लैजान थालेको हो । ’ नेपालमा वर्षमा करिव ४५ अर्ब रुपैया बराबरको औषधी कारोवार हुने गरेको तथ्यांक प्रस्तुत गर्दै त्यो मध्ये २५ अर्बको औषधी देश बाहिरबाट र २० अर्ब जतिको स्वदेशमा उत्पादन हुने गरेको दाहालले जानकारी दिए ।
पत्रकार सम्मेलनमा औषधी व्यवस्था विभागका बरिष्ठ फर्मासिस्ट पानबहादुर क्षेत्रीले औषधी उत्पादनका क्षेत्रमा नयाँ नयाँ प्रविधिको विकास भइरहेकोले त्यस्ता प्रविधिको जानकारी राख्नु र औषधी उत्पादनमा प्रयोग गर्नु आवश्यक रहेकाले एक्स्पो पलदायी हुने विश्वास व्यक्त गरे । एक्स्पोको प्रयोजक प्यासिफिक कमर्सियल कम्पनीका बिजेयेन्द्र श्रेष्ठले युरोग, अमेरिकामा औषधी प्रयोग हुने मेसिन प्रयोग हुने गरेको दावी गर्दै स्वदेशी औषधिको गुणस्तरमा शंका गर्नु नपर्ने बताए । औषधि उत्पादक संघका पूर्व अध्यक्ष शंकर घिमिरेले औषधीमा आत्मनिर्भर बन्न स्वदेशी औषधी उद्योगलाई सरकारले संरक्षण दिनु पर्नेमा जोड दिए ।
Leave a Reply