काठमाडौ,१३ फागुन । सरकारी चिकित्सकहरुले कर्मचारी समायोजन विधेयक परिमार्जन गरी आफ्ना माग सम्बोधन गर्न सरकारलाई ७२ घण्टे अल्टिमेटम दिएका छन् । कर्मचारी समायोजन विधेयकविरुद्ध आन्दोलनरत सरकारी डाक्टरले आईतबारदेखि लागु हुने गरी आफ्ना माग पूरा गर्न सरकारलाई ७२ घन्टे अल्टिमेटम दिएका हुन् ।
सरकारी चिकित्सक संघ (गोदान) ले विज्ञप्ति जारी गरी ७२ घण्टाभित्र आफ्ना माग पूरा गर्न माग गर्दै अन्यथा आकस्मिक बाहेकका सम्पूर्ण स्वास्थ्य सेवा बहिस्कार गर्न बाध्य हुने चेतावनी दिएको छ । अनेकौं छलफल, उच्चस्तरीय भेटघाटले समेत चिकित्सकका समस्या समाधान नगरिएकाले आफूहरुले सरकारलाई अल्टिमेटम दिनु परेको विज्ञप्तीमा उल्लेख छ ।
शनिबार बसेको गोदानको बैठकका निर्णय अनुसार अल्टिमेटम अवधिमा सबै सरकारी अस्पताल प्रांगणमा बिहान १० देखि ११ बजेसम्म विरोध तथा सचेतना धर्ना दिने कार्यक्रम रहेको छ।
१४ गतेभित्र समस्याको समाधान ननिस्किए १५ गते बुधबारबाट देशभरिका सरकारी स्वास्थ्य संस्थाहरुमा आकस्मिक बाहेकका अन्य स्वास्थ्य सेवा बहिस्कार गर्ने निर्णय गोदानले गरेको छ ।
यस्तै १५ गते सरकाले मनाउन लागेको स्वास्थ्य सेवा दिवस बहिष्कार गर्ने र यी विरोधका कार्यक्रम गर्दा पनि सरकारले माग सम्बोधन नगरे सबै सरकारी चिकित्सकले सामूहिक राजीनामा बुझाउने गोदानले चेतावनी दिएको छ ।
Leave a Reply