हेल्थ टुडेका सम्पादक सहित चिकित्सक र स्वास्थ्य पत्रकारलाई हेल्थ अवार्ड

हेल्थ टुडे,
काठमाडौं, ९ चैत :  हेल्थ टुडेका सम्पादक पदमराज जोशी सहित चिकित्सक, स्वास्थ्यकर्मी र स्वास्थ्य पत्रकारहरुलाई स्वास्थ्य दर्पण हेल्थ अवार्डबाट सम्मानित गरिएको छ । नेपाली कांग्रेसका महामन्त्री डा. शशांक कोइरालाले शनिबार राजधानीमा आयोजित स्वास्थ्य दर्पण मिडिया चितवनका सातौ बार्षिकोत्सव एवं हेल्थ अवार्ड वितरण समारोहमा हेल्थ अवार्ड सहित सम्मानित गरेका हुन । हेल्थ अवार्डबाट सम्मानित हुनेहरुमा चिकित्सकहरु डा. श्याम शुन्दर दाश, डा. मदनकुमार पिया, डा. शुरेश कुमार कनौडिया, डा. निरेश थापा, डा. श्यामराज रेग्मी, डा. चन्द्रप्रकाश पाण्डे, डा. अजय न्यौपाने, डा. भरत खत्री रहेका छन् । त्यसैगरि मेलानका पूर्व अध्यक्ष कुष्णप्रसाख रिजाल र स्वास्थ्यकर्मी गोविन्द नेपाललाई पनि अवार्ड सहित सम्मान गरिएको छ ।

संस्थागत अस्पताल तर्फ नेपाल क्यान्सर अस्पताल एण्ड रिसर्च सेन्टरका अध्यक्ष डा. सुदीप श्रेष्ठ र निर्देशक स्वरुपा श्रेष्ठलाई सम्मान गरिएको छ । स्वास्थ्य पत्रकारिताको माध्यमबाट योगदान गरेको भन्दै हेल्थ टुडेका सम्पादक जोशीका अलावा कान्तिपुर दैनिकका प्रमुख समाचारदाता अतुल मिश्र, हेल्थपोष्टनेपाल अनलाईनका सम्पादक दीपक दाहाल, जनस्वास्थ्य सरोकारका सम्पादक पुरुषोत्तम घिमिरे, हाम्रो डाक्टर अनलाइनको सम्पादक उद्घवराज भेटुवाल र हेल्थ टिभी अनलाईनकी सम्पादक कल्पना आचार्यलाई हेल्थ अवार्ड सहित सम्मान गरिएको हो । कार्यक्रममा प्रमुख अतिति डा. कोइरालाले स्वास्थ्य पत्रकारिताको विकासले मात्र स्वस्थ्य समाज निर्माण हुने भएकाले स्वास्थ्य पत्रकारिताको विकासमा सबैको ध्यान पुग्नु पर्ने बताए ।

पूर्व स्वास्थ्य राज्यमन्त्री डा. वंशिधर मिश्रले स्वास्थ्यका समाचार संवेदनशिल हुने भएकाले स्वास्थ्य पत्रकारहरुले समाचार सम्प्रेषणमा गम्भिर हुनु पर्नेमा जोड दिए । औषधि व्यवस्था विभागका महानिर्देशक नारायण ढकालले निश्पक्ष र तथ्यपरक समाचारले मात्र स्वास्थ्य क्षेत्रलाई अगाढि बढाउन सकिने बताए । पत्रकार महासंघका महासचिव रमेश बिष्ट, कान्तिपुर दैनिकका प्रमुख संवाददाता अतुल मिश्र, मिर्गौला रोग विज्ञ डा. ऋषिकुमार काफ्ले, चिकित्सक संघका उपाध्यक्ष डा. ढुण्डीराज शर्मा लगायतले स्वास्थ्य पत्रकारिताका बिभिन्न आयामका बिषयमा प्रकाश पारेका थिए । स्वास्थ्य दर्पण मिडिया चितवनका अध्यक्ष सन्दीप श्रेष्ठले स्वास्थ्य क्षेत्रमा नकारात्मक भन्दा सकारात्मक समाचारको खाचो रहेको औल्याउदै स्वास्थ्य क्षेत्रमा कार्यरत चिकित्सक, स्वास्थ्यकर्मी र सञ्चारकर्मिलाई प्रोत्साहन दिन हेल्थ अवार्ड प्रदान गरिएको बताए ।