हेल्थ टुडे,
डडेल्धुरा,२० कात्तिकः १७ औं पटक डडेल्धुरामा अनसन थालेका चिकित्सा शिक्षा सुधारका अभियन्ता डा. गोविन्द केसीको सत्याग्रहलाई नेपाली कांग्रेस डडेल्धुराले समर्थन जनाएको छ । गरिब निमुखा नेपाली जनताहरुको मागको नेतृत्व गरी डा.केसी सरकारसँग लड्दै आएको र सरकारले यथाशीघ्र माग सम्बोधन गर्नु पर्ने भन्दै कांग्रेसले सत्याग्रहमा समर्थन जनाएको हो ।
कांग्रेस जिल्ला कार्यसमिति सभापति एवं सुदूरपश्चिम प्रदेशसभा सदस्य कर्णबहादुर मल्ल लगायत जिल्ला कार्य समिति पदाधिकारी, महाधिवेशन प्रतिनिधी, नेवि संघका नेता कार्यकर्ता मंगलबार दिउँसो डा. केसीले सत्याग्रह बसेको घरमा पुगी माग सम्बोधनका पक्षमा समर्थन जनाएका हुन् ।
यसैबीच, अनसनरत डा.केसीले जनतामुखी र बिधानमुखी ऐन नहुञ्जेल आफु लड्ने बताएका छन्। सुदूरपश्चिमको पहाडी जिल्ला डडेल्धुरा पुगि सत्याग्रह थालेका डा.केसीले नागरिक र चिकित्सक हैसियतले समस्या सामाधानका लागि सरकारसंग लड्ने कर्तव्य भएको बताउँदै उनले जनतामुखी र बिधानमुखी ऐन नबन्दासम्म आफू लड्ने बताएका हुन् ।
चिकित्सा शिक्षाका विकृति विसंगति अन्त्य गर्नु पर्नेमा सरकार उल्टै निजी मेडिकल कलेजका ज्यादती संरक्षणमा लागेको डा. केसीको आरोप छ । उनले आफ्ना माग सम्बोधन नभए अझै कडा खालका माग अघि सार्ने चेतावनी दिए। आफूसँग सहमति गर्दै जाने तर कार्यान्वयन नगर्ने परिपाटीका कारण चिकित्सा शिक्षामा विकृति मौलाउँदै गएको उनको आरोप छ।
Leave a Reply