खोड्पेको सिद्धेश्वर स्वास्थ्य चौकीको स्वास्थ्य मन्त्री ढकालले गरे उद्घाटन

हेल्थ टुडे,
बैतडी, खोड्पे, ८ माघ : स्वास्थ्य तथा जनसंख्यामन्त्री भानुभक्त ढकालले बैतडीको पाटन नगरपालिका ८ स्थित खोड्पेमा नवनिर्मित सिद्धेश्वर स्वास्थ्य चौकी भवनको उद्घाटन गरेका छन् । ढकाल बिगत तिन दिनदेखि सुदूरपश्चिम प्रदेशका विभिन्न स्वास्थ्य सम्बन्धी कार्यक्रममा सहभागी हुन बैतडी पुगेका हुन । मन्त्री ढकालले कर्मचारी समायोजनका कारण स्वास्थ्य क्षेत्र प्रभावित भएको स्विकार गर्दै समायोजनले अहिले विभिन्न स्वास्थ्य संस्थाहरूमा कर्मचारी अभाव भएको बताए ।
‘स्वास्थ्यका कर्मचारी अभावप्रति गम्भीर ध्यानाकर्षण भएको छ’ उनले भने ‘समायोजन प्रक्रिया चाँडै टुंगिने र स्वास्थ्यका कर्मचारी अभाव रहने छैन्, त्यसका लागि सरकार लागि परेको छ।’ मन्त्री ढकालले भने । स्वास्थ्य संस्थाहरुमा स्वास्थ्य उपकरण कमी रहेकोले परिपूर्ति गर्न आफू लागि परेको उनले बताए ।
सुदूरपश्चिमका जनताको चाहना र आवश्यकता अनुसार बैतडीको खोड्पेमा ट्रमा सेन्टर स्थापनाका लागि पहल गर्ने पनि मन्त्री ढकालले बताए । खोड्पे बैतडी जिल्लाका साथै दार्चुला, बझाङ र डडेल्धुरा जिल्लाको समेत पायक पर्ने उचित स्थान भएको भन्दै स्थानीय सरोकारवालाले ट्रमा सेन्टर स्थापनाका लागि माग गरेका थिए ।
खोड्पेमा भएको स्वास्थ्य चौकी भवन उद्घाटनका अवसरमा मन्त्री ढकालसँगै बैतडीका सांसद समेत रहेका पूर्व अर्थराज्य मन्त्री दामोदर भण्डारी, बैतडीका प्रदेश सांसद लिलाधर भट्ट, सुदुरपश्चिम स्वास्थ्य निर्देशनालयका निर्देशक डा. गुणराज अवस्थी, पाटन नगरपालिकाका मेयर केशवबहादुर चन्दलगायत नेता एवं सर्वसाधारणको उपस्थिति थियो ।