सहिद धर्मभक्त राष्ट्रिय प्रत्यारोपण केन्द्रको निर्देशकमा प्रा.डा.ज्ञवाली

हेल्थ टुडे,
काठमाडौं, २६ बैसाख : भक्तपुरस्थित सहिद धर्मभक्त राष्ट्रिय प्रत्यारोपण केन्द्रको निर्देशकमा प्रा.डा. प्रेम ज्ञवाली नियुक्त भएका छन् । स्वास्थ्य तथा जनसंख्या मन्त्री भानुभक्त ढकालको सिफारिसमा मन्त्रीपरिषद्ले डा. ज्ञवालीलाई चार वर्षका लागि केन्द्रको निर्देशक नियुक्त गरेको हो । डा. ज्ञवाली त्रिवि शिक्षण अस्पतालका मिर्गौला प्रत्यारोपण सर्जन हुन । प्रधानमन्त्री केपी ओलीको गत महिना भएको मिर्गौला प्रत्यारोपण गर्ने टोलीमा डा.ज्ञवाली पनि थिए । केन्द्रका नव नियुक्त निर्देशक डा. ज्ञवालीले नियुक्त भएको खवर र बधाई आएको भए पनि औपचारिक पत्र भने पाइनसकेको बताए । मिर्गौला र कलेजो प्रत्यारोपण गर्दै आइरहेको केन्द्रले अहिलेसम्म ६ सयभन्दा बढीको मिर्गौला प्रत्यारोपण गरिसकेको छ भने ४ वटा कलेजो प्रत्यारोपण गरेको छ । यस अगाडि केन्द्रको निर्देशक प्रत्यारोपण सर्जन डा.पुकारचन्द्र श्रेष्ठ थिए ।