स्वास्थ्य तथा जनसंख्या वैज्ञानिकहरुको छैटौँ शिखर सम्मेलन शुरु, मन्त्री ढकालले गरे सम्मेलनको उद्घाटन

हेल्थ टुडे,

काठमाडौँ, २२ असार :  स्वास्थ्य तथा जनसंख्या वैज्ञानिकहरुको छैटौ भर्चुअल  शिखर सम्मेलन आजदेखि राजधानीमा शुरु भएको छ । नेपाल स्वास्थ्य अनुसन्धान परिषदको आयोजना भएको सम्मेलनको उद्घाटन स्वास्थ्य तथा जनसंख्या मन्त्री भानुभक्त ढकालले गरेका हुन । नेपाल स्वास्थ्य अनुसन्धान परिषद्को सभाहलमा सुरु भएको सम्मेलनमा स्वास्थ्य मन्त्री ढकाल, परिषद्का अध्यक्ष प्रा. डा. अन्जनीकुमार झा, कार्यकारी सदस्य सचिव डा. प्रदीप ज्ञवाली, विश्व स्वास्थ्य संगठनका प्रतिनिधि र केही वरिष्ठ चिकित्सक सहित अनुसन्धानकर्ताको उपस्थिति रहेको थियो । कोरोना भाइरसको संक्रमण र लकडाउनको बेला सम्मेलन आयोजना गरिएकोले  सम्मेलनमा बैज्ञानिक तथा सहभागीहरुको उपस्थिति भर्चुअल रुपमा रहेको थियो । परिषद्को आफ्नो स्थापना दिवसको अवसर पारेर अप्रेल १० देखि १२ सम्म हरेक वर्ष आयोजना गर्दै आइरहेको सम्मेलन यो वर्ष कोरोना भाइरसको कारण स्थगित गरिएको थियो । स्वास्थ्य क्षेत्रमा भएका नयाँ नयाँ अनुसन्धानलाई जनसमक्ष ल्याउनु महत्वपूर्ण भएकाले भर्चुअल भए पनि सम्मेलन गर्ने सल्लाह भएपछि सम्मेलन आयोजना गरिएको परिषद्ले जनाएको छ ।

सम्मेलन उदघाटनका अवसरमा बोल्दै स्वास्थ्य तथा जनसंख्या मन्त्री ढकालले परिषदले स्वास्थ्यका महत्वपूर्ण क्षेत्रहरुको पहिचान गरी प्रथमिकताका आधारमा रहेर ती क्षेत्रहरुमा अध्ययन अनुसन्धान गरी तथ्यमा आधारित नीति तथा कार्यक्रम निर्माण गर्न उल्लेखनिय भूमिका खेलेको बताए । उनले स्वास्थ्य मन्त्रालयले नेपाल स्वास्थ्य अनुसन्धान परिषदको सहकार्यमा विभिन्न कार्यक्रमहरु सञ्चालन गर्दै आएको भन्दै आगामी दिनमा पनि स्वास्थ्य क्षेत्रको समग्र विकास तथा सुदृढिकरणका लागि स्वास्थ्य मन्त्रालयल सदैव तत्पर रहने आश्वासन दिए ।

उद्घाटन सत्रमा स्वास्थ्य राज्यमन्त्री नवराज रावत, परिषद्का अध्यक्ष प्रा. डा अञ्जनीकुमार झा, उपाध्यक्ष डा भोजराज अधिकारी, कार्यकारी सदस्य सचिव डा प्रदीप ज्ञवाली, डव्लुएचओका नेपाल प्रमुख डा जोश भ्यान्डिलियर लगायतले बोलेका थिए ।

सम्मेलनमा स्वदेशी तथा विदेशी अनुसन्धानकर्ताहरुले ८६ वटा जनस्वास्थ्यका विषयमा अनुसन्धान प्रस्तुत गर्ने परिषदका कार्यकारी प्रमुख डा प्रदिप ज्ञवालीले जानकारी दिए । ती मध्ये ३२ वटा मौखिक प्रस्तुतिकरण र ५४ वटाको पोष्टर प्रस्तुतिकरण हुने बताइएको छ । यसका साथै १० वटा आमन्त्रित प्रस्तुतीकरण समेत रहने छ । सम्मेलनको उद्घाटन  सत्रको नेपाल टेलिभिजनले प्रत्यक्ष प्रशारण गरेको थियो । परिषदको फेसबुक पेज र जुम सफ्टवेरमा माध्यमबाट आम सर्वसाधारण तथा सरोकारवाल समक्ष पु¥याइएको थियो ।