नेपाल चिकित्सक संघ र स्वास्थ्य अनुसन्धान परिषदबिच स्वास्थ्य अनुसन्धानमा सहकार्य

हेल्थ टुडे,
काठमाडौं, ६ साउन : नेपाली चिकित्सकहरुको छाता संगठन नेपाल चिकित्सक संघ (एनएमए) र नेपाल स्वास्थ्य अनुसन्धान परिषद् (एनएचआरसी) स्वास्थ्य अनुसन्धानका क्षेत्रमा मिलेर अगाडि बढ्ने भएका छन् । एनएमए र एनएचआरसीबिच गत १८ सेप्टेम्बर २०२२ मा स्वास्थ्य अनुसन्धानका क्षेत्रमा मिलेर अगाडि बढ्ने सम्झौता पत्रमा एनएमएका तत्कालिन अध्यक्ष डा. लोचन कार्की र एनएचआरसीका सदस्य सचिव डा. प्रदीप ज्ञवालीले हस्ताक्षर गरेका थिए । उक्त सम्झौता ५ वर्षका लागि गरिएको थियो । सम्झौता अनुसार स्वास्थ्य अनुसन्धानलाई अगाडि बढाउन विज्ञहरुसँग सुझाव लिन शनिबार एनएमएले छलफल कार्यक्रमको आयोजना गरेको थियो ।
छलफलमा एनएमएका निवर्तमान अध्यक्ष डा.लोचन कार्कीले एनएमएलाई स्वास्थ्य अनुसन्धानका क्षेत्रमा पनि संलग्न गराएर स्वास्थ्य सेवा र स्वास्थ्य नीतिमा सुधार ल्याउन एनएचआरसीसँग सहकार्य गरेर अगाडि बढ्न लागेको जानकारी दिए । अनुसन्धानले चिकित्सकहरुको क्षमता अभिवृदिमा समेत सघाउ पुग्ने र सरकारलाई पनि नीति बनाउन सहयोग पुग्ने डा. कार्कीको दावी थियो । एनएचआरसीका सदस्य सचिव डा.प्रदीप ज्ञवालीले चिकित्सकहरु र हस्पिटलबिना स्वास्थ्यका अनुसन्धान अधुरो र अपुरो हुने भएकाले एनएमएसँग सहकार्य गरेर अगाडि बढ्न चाहेको प्रष्ट पारे । नेपाल चिकित्सक संघका पुर्व अध्यक्ष एवं एनएचआरसीका पुर्व अध्यक्ष प्रा.डा.चोपलाल भुसालले स्वास्थ्य अनुसन्धानका क्षेत्रमा दुबै संस्थाले ऐतिहासिक कार्यको सुरुवात गरेकोमा खुशी व्यक्त गर्दै अब ढिला नगरि अनुसन्धानमा लाग्नु पर्ने आवश्यकता रहेकोमा जोड दिए । एनएमएका पुर्व अध्यक्ष डा. भोजराज जोशीले औचित्यताको आधारमा अनुसन्धान गनर्् पर्ने सझाव दिए । इपिडिमियोलोजी तथा रोग नियन्त्रण महासाखाका पुर्व निर्देशक डा. जिडी ठाकुरले स्वास्थ्य अनुसन्धानका लागि आर्थिक व्यवस्थापनलाई पनि प्राथमिकतामा राखेर अगाडि बढ्नु पर्ने बताए ।
भिडियो पन्फरेन्स मार्फत छलफलमा भाग लिदै जरनल नेपाल मेडिकल एसोसिएसन (जेएनएमए) का सम्पादक डा.एन्जल मगरले एनएमए र एनएचआरसीको संयुक्त पहलमा हुने अनुसन्धान गुणस्तरीय हुने बिताउदै भविश्यमा अनुसन्धानकर्ताले लेख्ने रसर्च आर्टिकल पनि स्तरीय हुने विश्वास व्यक्त गरे । छलफलमा एनएमएका उपाध्यक्ष डा. बद्री रिजाल, महासचिव डा.संजिव तिवारी र अध्यक्ष डा.अनिल विक्रम कार्कीले चिकित्सकहरुलाई अनुसन्धानमा संलग्न गराउने काम दुबै संस्थाको हितमा भएको बताउदै अनुसन्धानबाट प्राप्त नतिजाका आधारमा सरकारले आफ्ना नीति बनाउन पनि सहयोग पुग्ने बताए । अनुसन्धानलाई अगाडि बढाउन एनएमएले निवर्तमान अध्यक्ष डा. लोचन कार्कीको संयोजकत्वमा डा. एन्जल मगर, डा. चोपलाल भुसाल, डा.केदारनरसिंह केसी, डा. अन्जनी झा र प्रशासकिय अधिकृत मिलन खनाल सदस्य रहेको समिति बनाएको छ । समितिले छिट्टै अनुसन्धानको कार्य अगाडि बडाउने एनएमएले जनाएको छ ।