नेपाल स्वास्थ्य अनुसन्धान परिषद्को सदस्य सचिवमा डा. प्रमोद जोशी नियुक्त

हेल्थ टुडे,
काठमाडौं, ६ फागुन : सरकारले नेपाल स्वास्थ्य अनुसन्धान परिषद्को कार्यकारी सदस्य सचिवमा डा. प्रमोद जोशीलाई नियुक्त गरेको छ । आज (आइतबार) बसेको मन्त्रीपरिषद्को बैठकले डा.जोशीलाई चार वर्ष कार्यकाल तोकेर कार्यकारी सदस्य नियुक्त गर्ने निर्णय गरेको हो । डा.जोशी अर्थोपेडिक सर्जन हुन् । यस अघि डा.जोशी कैलालीको गेटामा रहेको गेटा अस्पतालको निर्देशक थिए । डा.जोशीकै पहलमा गेटा अस्पतालले गत कार्तिकबाट पहिलो चरणमा १०० शैयाको अस्पताल सञ्चालन सहित ओपिडी सेवा सुरु गरेको थियो । डा.जोशीले राष्ट्रिय ट्रमा सेन्टरको निर्देशकको जिम्मेवारी समेत निर्वाह गरिसकेका छन् । यस अघिका सदस्य सचिव डा. प्रदीप ज्ञवालीको पदावधि माघ २६ गते समाप्त भएपछि उक्त पद रिक्त थियो । डा. जोशी नेपाल चिकित्सक संघको कोषाध्यक्ष समेत हुन । डा. जोशी स्वास्थ्य सेवाका दशौं तहका चिकित्सक हुन् । स्वास्थ्य अनुसन्धान परिषद्ले स्वास्थ्य क्षेत्रमा हुने अध्ययन अनुसन्धान गर्ने र गराउने गर्दै आएको छ ।