कान्ति बाल अस्पतालको सेवा सुधार गर्न उपप्रधानमन्त्री एवं स्वास्थ्य मन्त्री यादवको निर्देशन

हेल्थ टुडे,
काठमाडौं, १४ चैत : उपप्रधानमन्त्री एवं स्वास्थ्य तथा जनसंख्या मन्त्री उपेन्द्र यादवले बुधबार कान्तिबाल अस्पतालको आकस्मिक अनुगमन गरेका छन् । मन्त्री यादवले अस्पतालले प्रदान गरिरहेको सेवा सुधार गर्न अस्पताल प्रशासनलाई निर्देशन दिएका छन् ।
मन्त्री यादवले उपचारका लागि आएका बिमारीलाई कुनै पनि अवस्थामा फर्काउन नहुनेमा जोड दिदै त्यसका लागि आवश्यक प्रवन्ध मिलाउन अस्पतालका निर्देशक डा. पंकज रायलाई निर्देशन दिएका छन् । ‘उपचारका लागि अस्पताल ल्याइएका कुनै पनि बालबालिका आइसियु बेड खाली नभएर वा मेसिन बिग्रेर जस्ता कुनै पनि कारणले उपचार नगरी फर्काउने कार्य बन्द गर्नु पर्छ । ’ मन्त्री यादवले भने, ‘आइसीयु बेड थपेर वा सेवा बिस्तार गरेर भएपनि आइन्दा बिरामी बालबालिकालाई भर्ना नलिई फर्काउने प्रबृत्ति अन्त्य गर्नै पर्छ । ’ मन्त्री यादवले सिटी स्क्यान, एमआरआई, एक्स रे जस्ता बिग्रेको अवस्थामा रहेका कुनै पनि मेसिन तत्काल बनाएर सेवा सुचारु गर्न पनि डा. रायलाई निर्देशन दिएका छन् । अस्पतालमा सञ्चालित फार्मेसीमा आवश्यक सबै प्रकारका औषधि तत्काल उपलब्ध गराउने, भित्रको फार्मेसीमा औषधि नपाएर बाहिर किन्नु पर्ने अवस्थाको तत्काल अन्त्य गर्नु पर्ने र बिरामीले टिकट र रिर्पोट लिनको लागि घन्टौ लाइनमा बस्नु पर्ने अवस्थाको अन्त्य गर्न अनलाइन टिकट काट्न मिल्ने र अनलाइनमैं रिर्पोट हेर्न वा डाउनलोड गर्न मिल्ने व्यवस्था तत्काल मिलाउन पनि मन्त्री यादवले अस्पताल प्रशासनको ध्यान आकर्षण गराएका छन् । मन्त्री बस्नेतलाई कान्ति बाल अस्पतालका निर्देशक डा. रायले अस्पतालले प्रदान गरिरहेका सेवा र समस्याका बिषयमा जानकारी गराएका थिए । कान्ति बाल अस्पतालले प्रदान गरिरहेको सेवा र बेड अभावमा केही बिरामीले फर्कनु परेको घटना सार्वजनिक भए पछि मन्त्री यादवले अस्पतालको अनुगमन गरेका थिए ।