स्वास्थ्य अनुसन्धान परिषदको काम प्रशंसनिय छ : शिक्षा मन्त्री भट्टराई

हेल्थ टुडे,
काठमाडौँ, २८ चैत : शिक्षा,विज्ञान तथा प्रविधि मन्त्री विद्या भट्टराईले नेपाल स्वास्थ्य अनुसनधान परिषद्ले वैज्ञानिक अनुसन्धान गर्ने र गराउने काममा खेलेको भूमिका प्रशंसनिय रहेको बताएकी छिन । एघारौ स्वास्थ्य तथा जनसंख्या वैज्ञानिकहरुको शिखर सम्मेलनको राजधानीमा बिहीबार उदघाटन गर्दै मन्त्री भट्टराईले यस किसिमका सम्मेलनबाट प्राप्त तथ्य र प्रमाणबाट सरकार लाई दिगो नीति बनाउन सहयोग पुग्नेमा जोड दिइन ।
तथ्य र प्रमाणमा आधारित नीतिले मात्र जनताको वास्तविक जिवनमा परिवर्तन ल्याउने दाबी गर्दै मन्त्री भट्टराईले परिषद्ले आफ्नो स्थापना कालदेखि अहिलेसम्म गरेको २०० वटा अनुसन्धानले सरकारलाई नीति निर्माण गर्ने कुरामा धेरै सहयोग पुगेको बताइन । मन्त्री भट्टराईले दिगो विकासका लक्ष्यहरु पुरा गर्न सम्मेलनले सहयोग पुग्ने बताइन ।
सम्मेलनको उदघाटन सत्रलाई सम्बोधन गर्दै योजना आयोगका उपाध्यक्ष प्रा.शिव अधिकारीले अहिलेसम्म परिषद्ले अहिलेसम्म गरेको अनुसन्धान सन्तोषजनक भए पनि प्रयाप्त भने नरहेकोले अझै नयाँ नयाँ अनुसन्धानमा लाग्नु पर्नेमा जोड दिए । योजना आयोगका सदस्य डा.आरपी बिच्छाले योजना आयोगलाई पनि भावी योजना बनाउदा तथ्य र प्रमाणमा आधारित योजना बनाउन अनुसन्धानको भूमिका अहं रहेको बताए ।
चिकित्सा शिक्षा आयोगका उपाध्यक्ष डा. अन्जनीकुमार झाले अनुसन्धान गर्नको लागि धेरै ठूलो बजेट नै चाहिन्छ भन्ने भ्रम त्यागेर सानो सानो बजेटमा पनि प्रभावकारी अनुसन्धान गर्न सकिने सुझाव दिए ।सम्मेलनमा नेपाल स्वास्थ्य अनुसन्धान परिषद्का कार्यकारी सदस्य सचिव डा.प्रमोद जोशीले सम्मेलनका सहभागीलाई स्वागत गरेका थिए भने परिषद्का उपाध्यक्ष डा.अजित राइमाझीले सहभागीलाई धन्यवाद दिएका थिए । तिन दिनसम्म चल्ने सम्मेलनमा देश र विदेशबाट गरि करिव एक हजार एक सय जना अनुसन्धानकर्ता सहभागी छन् । सम्मेलनको यस वर्षको मुख्य नारा “स्वास्थ्य, जलवायु र जनसंख्यामा परिवर्तनः दिगो र समावेशी भविष्यको लागि उत्थानशील स्वास्थ्य प्रणाली” रहेको छ ।
सम्मेलनमा १४६ वटा मौखिक र १३० वटा पोष्टर प्रस्तुतिकरण हुने छन ।