नेपालमा पहिलोपटक नेपाली चिकित्सकद्वारा मस्तिष्कमृत व्यक्तिको मिर्गौला र कलेजो एकै व्यक्तिमा प्रत्यारोपण

पदमराज जोशी,
भक्तपुर, ११ जेठ : संसारकै सबैभन्दा दुर्लभ र जटिल शल्यक्रियामध्ये पर्ने मस्तिष्कमृत व्यक्तिबाट प्राप्त मिर्गौला र कलेजो एकै व्यक्तिमा सफल प्रत्यारोपण गरेर नेपाली चिकित्सकहरुले वाहवाह पाएका छन् । भक्तपुरको शहीद धर्मभक्त राष्ट्रिय प्रत्यारोपण केन्द्रले पहिलो पटक मस्तिष्क मृत्यु भएका व्यक्तिबाट प्राप्त मिर्गौला र कलेजो एकै व्यक्तिमा सफलतापूर्वक प्रत्यारोपण गरेको छ । शहीद धर्मभक्त राष्ट्रिय प्रत्यारोपण केन्द्रका कार्यकारी निर्देशक समेत रहेका अंग प्रत्यारोपण सर्जन डा. पुकारचन्द्र श्रेष्ठ नेतृत्वको नेपाली चिकित्सक टीमले सफल ताका साथ उक्त प्रत्यारोपण गरेका हुन । केन्द्रले आईतबार पत्रकार सम्मेलनको आयोजना गरि औपचारिक जानकारी गराएको हो । यो सफलता नेपालका लागि पहिलो र विश्वमै दुर्लभ भएको डा. श्रेष्ठले जानकारी दिए ।
पत्रकार सम्मेलनमा मकवानपुरका ५१ वर्षीय शिव महर्जनमा मिर्गौला र कलेजो दुवै अंग प्रत्यारोपण गरिएको छ भने अर्को मिर्गौला ४२ वर्षीया महिलामा प्रत्यारोपण गरिएको डा. श्रेष्ठले अंग प्रत्यारोपण गरिएका बिरामीहरूले स्वास्थ्यलाभ गरिरहेका छन् । उनीहरू केही दिनमै डिस्चार्ज हुने तयारीमा रहेको डा.श्रेष्ठले जानकारी दिए । दुर्घटनामा परेर काठमाडौं मेडिकल कलेज सिनामंगलमा उपचाररत १८ वर्षीय पुरुषबाट मस्तिष्क मृत्यु भएपछि उनीबाट दुई मिर्गौला र एक कलेजो प्राप्त भएको थियो । काठमाडौं मेडिकल कलेजको टिमले अंग झिकेको थियो ।
पत्रकार सम्मेलनमा दिइएको जानकारी अनुसार प्रत्यारोपण जेठ १ गते देखि सुरु गरेर चार दिन सम्म लागेको थियो । प्रत्यारोपणमा डा. पुकारका अलावा डा. कल्पना श्रेष्ठ, डा. रोसन घिमिरे, डा. दिपेश श्रेष्ठ, डा. सुरेश महर्जन, डा. विजय केसी, डा. कृष्ण बुढाथोकी सहितका चिकित्सकको सहयोग रहेको थियो ।
मिर्गौला र कलेजो दुवै अंग प्रत्यारोपण गरिएका मकवानपुरका ५१ वर्षीय शिव महर्जनको स्वास्थ्य अवस्था सुधारोन्मुख छ । उनले पत्रकार सम्मेलनमा भिडियो मार्फत पत्रकारहरुसँग कुराकानी गरेका थिए । केन्द्रका निर्देशक डा. पुकार सहितका चिकित्सकहरुको अथक प्रयासले आफुले नयाँ जिवन पाएको शिवले बताएका छन् । केन्द्रले वि.सं. २०७३ मंसिर २२ मा पहिलो पटक दक्षिण कोरियाली विज्ञको सहयोगमा कलेजो प्रत्यारोपण गरेको थियो । नेपाली टोलीबाट नेपालकै पहिलो कलेजो प्रत्यारोपण डा. पुकारको नेतृत्वमा २०७५ कार्तिक १२ गते भएको थियो । हालसम्म सबैभन्दा धेरै ३४ जनाको कलेजो प्रत्यारोपण भएको छ । केन्द्रकी नेफ्रोलोजिष्ट डा. कल्पना श्रेष्ठले टीम वर्कले मात्र यस्तो दुर्लभ प्रत्यारोपण संभव भएको बताइन । केन्द्रमा अहिलेसम्म १४ सय भन्दा बढीको मिर्गौला प्रत्यारोपण भएको छ ।