मधेश प्रदेशमा ७ प्रतिसत जनताले मात्र गराए स्वास्थ्य बिमा

हेल्थ टुडे,
काठमाडौं, १२ मंसिर : मधेश प्रदेशमा ७ प्रतिसत जनताले मात्र स्वास्थ्य बिमा गराएका छन् । देशभरि औषत साडे २२ प्रतिसतले स्वास्थ्य बिमा गराएकोमा मधेश प्रदेशमा सबैभन्दा कम ७ प्रतिसतले मात्र स्वास्थ्य बिमा गराएको पाइएको छ ।
दातृ निकाय र स्वास्थ्य तथा जनसंख्या मन्त्रालयको संयुक्त आयोजनामा सोमबारदेखि भक्तपुरमा सुरु भएको दुई दिने राष्ट्रिय संयुक्त वार्षिक समिक्षा कार्यक्रममा स्वास्थ्य बिमा बोर्डका कार्यकारी निर्देशक डा. दामोदर बसौलाले मधेश प्रदेशमा देशका अन्य सात प्रदेशको तुलनामा स्वास्थ्य बिमा गराउनेको प्रतिसत कम भएको बताए । जनचेतनाको अभावमा बिमा गराउनेको संख्यामा कमि आएको हुन सक्ने बताउदै मधेश प्रदेशमा जनचेतनामूलक कार्यक्रम आवश्यक रहेकोमा डा. बसौलले जोड दिए । स्वास्थ्य बिमामा ५९ लाख ६८ हजार मानिस समाहित भएको बताउदै डा. बसौलाले गत वर्षमात्र ९ अर्व ७३ करोड उपचार गराए वाफत स्वास्थ्य संस्थाहरुलाई भुक्तानी दिइएको जानकारी दिए । कार्यक्रममा कार्यपत्र प्रस्तुत गर्दै डा. बसौलाले बिगत ६ वर्षदेखि सञ्चालनमा आएको स्वास्थ्य बिमा कार्यक्रम मार्फत २४ अर्ब ६६ करोड भुक्तानी दिइएको बताए । स्वास्थ्य विमा प्रति जनताको आकर्षण बढेको दावी गर्दै उनले भने, ‘ २३ लाख ९३ हजार जनाले स्वास्थ्य बिमा मार्फत सेवा लिएका छन । यो संख्या बढ्दो छ । ’
देशका ७५३ स्थानिय निकायमध्ये ४१० मा यो सेवा पुग्न नसकेको स्विकार्दै डा. बसौलाले सबै स्थानिय निकायमा स्वास्थ्य बिमा पुर्याउन बोर्ड लागि परेको बताए ।
स्वास्थ्य तथा जनसंख्या मन्त्री भवानी खापुङले स्वास्थ्य बिमा कार्यक्रमप्रति जनताको विश्वास र गुनासो दुबै उत्तिकै भएकाले यो कार्यक्रमलाई सफल बनाउन सबै पक्ष जिम्मेवार भएर लाग्नु पर्ने बताए ।
समिक्षा कार्यक्रममा स्वास्थ्य तथा जनसंख्या मन्त्रालयका सचिव डा. रोषन पोखरेलले हालै सार्वजनिक गरिएको जनसांख्यिक स्वास्थ्य सर्वेक्षणको संक्षिप्त रिपोर्टले स्वास्थ्य क्षेत्रमा भएका प्रगति सन्तोषजनक भएको नपाइएकोले गम्भिर समिक्षा गरेर अगाडि बढ्नु पर्नेमा जोड दिए । स्वास्थ्य बिमा बोर्डले काम गरिरहेको भए पनि जनता खुशी नभएको तिताृे यथार्तलाई आत्मसात् गर्दै अस्पतालहरु पनि उत्तिकै जिम्मेवार हुनु पर्ने बताए । समिक्षा कार्यक्रममा स्वास्थ्य तथा जनसंख्या मन्त्रालय मातहतका विभाग, महासाखा र प्रदेशको स्वास्थ्य अवस्थाको प्रगतिका बिषयमा समिक्षा हुने छ ।