छलाङ मार्दै धर्मभक्त प्रत्यारोपण केन्द्र, भदौमा मात्रै २८ जनाको प्रत्यारोपण

हेल्थ टुडे,
काठमाडौं, १० असोज मिर्गौला प्रत्यारोपणको क्षेत्रमा भक्तपुर स्थित शहीद धर्मभक्त राष्ट्रिय प्रत्यारोपण केन्द्रले उल्लेखनिय काम गरेको छ । गत भदौ महिनामा मात्र २८ जनाको अंग प्रत्यारोपण गरेको केन्द्रले जनाएको छ । त्यसमध्ये २७ जनाको मिर्गौला प्रत्यारोपण गरेको थियो भने एक जनाको कलेजो प्रत्यारोपण गरेको थियो । स्थापनाको ११ वर्ष अवधिमा केन्द्रले एक हजार एक सय २७ जनाको मिर्गौला र १३ जनाको कलेजो प्रत्यारोपण सम्पन्न गरेको केन्द्रका कार्यकारी निर्देशक एवं मिर्गौला तथा कलेजो प्रत्यारोपण विशेषज्ञ डा.पुकारचन्द्र श्रेष्ठले जानकारी दिए ।
केन्द्रले नेपालमै पहिलो पटक डा. श्रेष्ठको नेतृत्वमा २०७३ मंशीर २२ गते कलेजो प्रत्यारोपण र २०७४ बैशाख २८ गते पहिलो पटक मस्तिष्क मृत्यू भएका व्यक्तिको मृर्गौला प्रत्यारोपण गरी हालसम्म पाँच जना मष्तिष्क मृत्यू भएका व्यक्तिबाट १० जनाको मिर्गौला र ३ जनाको कलेजो प्रत्याारोपण गरेको छ भने आपसी साटासाटबाट हाल सम्म ४६ जोडीको मिर्गौला प्रत्यारोपण समेत भइसकेको छ ।
नेपाल सरकार स्वास्थ्य तथा जनसंख्या मन्त्रालय अन्तर्गतकों शहीद धर्मभक्त राष्ट्रिय प्रत्यारोपण केन्द्रले संस्थाको आफ्नै भवन नभएको अवस्थामा पनि सबै भन्दा धेरै कलेजो र मिर्गौला प्रत्यारोपण गर्नका साथै अंगदान सम्बन्धी व्यापक प्रचार प्रशार गरेको तथा देश भरी प्रत्यारोपण र डायलाइसिस सेवा विस्तार गर्न प्रयासरत रहेको छ । गण्डकी प्रदेशको पोखरा स्वास्थ्य विज्ञान प्रतिष्ठान र साथै कर्णाली प्रदेशको सुर्खेत प्रादेशीक अस्पतालमा प्रत्यारोपण सेवा सुरु भइसकेको छ ।