पत्रकार उपचारका लागि प्रेस युनियनले खडा गर्यो एक करोडको कोष

हेल्थ टुडे
नेपाल प्रेस युनियनले पत्रकार उपचारका लागि करोड रुपैया रासीको कोष स्थापना गरेको छ । प्रेस युनियन स्थापनाको रजत महोत्सवको अवसरमा बिहीबार राजधानीको आनन्द पार्टी भेन्यूमा आयोजना गरिएको बिशेष कार्यक्रममा युनियनका अध्यक्ष बद्री सिग्देल र महासचिव अजयबाबु सिवाकोटीले आर्थिक अभावका कारण उपचार नपाएका पत्रकारलाई सघाउन एक करोड रुपैया रासीको कोष स्थापना गरिएको घोषणा गरेका हुन ।
कोषमा एक वर्षभित्र एक करोड रुपैया संकलन गरिने छ । नेपाली कांग्रेसका सभापती शेरबहादुर देउवा, महामन्त्री डा. शशांक कोइराला, विमलेन्द्र निधि, अर्जुननरसिहं केसी, पूर्णबहादुर खड्का सहितका नेताहरुको उपस्थितिमा युनियनका महासचिव सिवाकोटीले यो अभियानमा पार्टी, नेता, कार्यक्रता, पत्रकार, सरकार र नागरिक समाजको सहयोग अपेक्षा गरेको बताए । कार्यक्रममा प्रेस युनियनका सदस्य राजाराम कार्कीले ११ हजार रुपैयाको चेक युनियनका अध्यक्ष सिंग्देललाई हस्तान्तरण गर्दै अभियानको सुभारम्भ गरेका थिए ।
युनियनको अभियानमा पार्टीले तन, मन र धनले सहयोग गर्नुका साथै युनियनका लागि आवश्यक पर्ने सहयोगका लागि पार्टीको ढोका सधै खुल्ला रहेको पार्टीका महामन्त्री डा. कोइरालाले बताए । ब्रेन ट्युमरका कारण गत महिना मृत्यु भएका युनियनका सचिव सूर्य क्षेत्रीको उपचारकालागि युनियनले हारगुहार गर्नु परेको घटनाबाट पाठ सिकेर उपचार कोषको अवधारणा ल्याइएको र युनियनले यसलाई पूरा गर्ने महासचिव सिवाकोटीले बताए ।
कार्यक्रमा प्रेस युनियनका स्थापक सदस्यहरुलाई पार्टी सभापति देउवाले सम्मान गरेका थिए । प्रेस युनियनको स्थापना २०४८ साल जेठ १३ गते भएको थियो ।