आईओएमको डीनका लागि १३ जनाले दिए आवेदन

हेल्थ टुडे,
काठमाडौं, १ असोज : त्रिभुवन विश्वविद्यालय चिकित्साशास्त्र अध्ययन संस्थान (आईओएम) को रिक्त डिनका लागि १३ जनाले आवेदन दिएका छन् । आवेदन दिनेमा गत असारमा कार्यकाल सकिएर काम चलाउ अवस्थामा रहेकी डिन प्रा.डा.दिव्या सिंह,सहायक डिन प्रा.डा.अभिमन्यु झा, त्रिवि शिक्षण अस्पतालका निर्देशक डा. दिनेश काफ्ले , कलेजो रोग विज्ञ प्रा.डा.रमेशसिंह भण्डारी, प्रा.डा. मोहनराज शर्मा, प्रा.डा. निरजु रञ्जित र प्रा.डा. रामचन्द्र अधिकारी छन् । त्यस्तै मुटु रोग विज्ञ प्रा.डा. उत्तमकृष्ण श्रेष्ठ, प्रा.डा. मिथा राना, सहप्राध्यापक डा. ज्योतिबाबा श्रेष्ठ, प्रा.डा. संगरत्न बज्राचार्य, प्रा.डा. रत्नमणि गजुरेल र प्रा.डा. सुधा बस्नेतले पनि आवेदन दिएका छन् ।
चिकित्सा शास्त्र अध्ययन संस्थानको डिन सिफारिसका लागि त्रिवि कार्यकारी परिषद्ले गत साउन ३२ मा प्राध्यापक डा. कृष्णकुमार ओलीको संयोजकत्वमा तीन सदस्यीय समिति गठन गरेको थियो ।
समितिका अन्य सदस्यहरूमा प्राध्यापक डा. सुवासप्रसाद आचार्य र प्राध्यापक डा. योगेन्द्रमान शाक्य रहेका छन् । उक्त समितिले आईओएमको नयाँ डिन नियुक्तिका लागि उम्मेदवारहरूको मूल्यांकन र सिफारिस गर्ने जिम्मेवारी पाएको छ ।
समितिले ५ जना उम्मेदवारहरूलाई छोटो सूचीमा राख्नेछ । छोटो सूचीमा परेका उम्मेदवारमध्येबाट ३ जनाको नाम वर्णानुक्रम अनुसार त्रिवि कार्यकारी परिषद्लाई सिफारिस गरिने सिफारिस समितिका एक सदस्यले बताए ।