को बन्ला स्वास्थ्य सचिव ?

हेल्थ टुडे

काठमाडौं, ११ मंसिर :  स्वास्थ्य मन्त्रालयकी सचिव डा. किरण रेग्मी यही मंसिर १७ गतेदेखि सेवा निवृत हुने भएपछि अव स्वास्थ्य सचिव को हुने ? भन्ने चासो र चर्चा सुरु भएको छ । स्वास्थ्य सेवा ऐन अनुसार चिकित्सकले मात्र स्वास्थ्य मन्त्रालयको सचिव बन्न पाउने व्यवस्था छ । स्वास्थ्य सचिव बन्न मन्त्रालयको १२ औं तहमा कार्यरत चिकित्सक हुनु पर्छ । डा. किरण बाहेक अहिले स्वास्थ्य मन्त्रालयमा तीन जना चिकित्सक १२ औं तहमा कार्यरत छन् । डा. पुष्पा चौधरी, डा. विनोदमान श्रेष्ठ र डा. सुशिल प्याकुरेल अहिले १२ औं तहमा छन् । चार दिन महिले मात्र १२ औं तहमा नियुक्त भएका डा. तरुण पौडेल मंसिर ११ बाट सेवा निवृत भएका छन् । अव स्वास्थ्य मन्त्रालयको सचिवको पदमा डा. चौधरी, डा. श्रेष्ठ र डा. प्याकुरेल मध्ये एक जना पुग्नेछन् ।

मन्त्रालयको सचिव मन्त्री परिषद्ले गर्छ । १२ औं तहका तिनै जनाको नाम मन्त्रीपरिषद्मा पेस  हुने र ती मध्ये मन्त्री परिषद्ले एक जनालाई स्वास्थ्य मन्त्रालयको सचिवमा नियुक्त गर्ने मन्त्रालयका अधिकारीले बताए । १२ औं तहमा वरिष्ठताका आधारमा भन्दा पनि मन्त्रीपरिषद्ले जसलाई नियुक्त गर्न खोज्यो त्यही सचिवमा नियुक्त हुने ती अधिकारीले बताए । सचिव नियुक्त गर्दा राजनीतिक भागबण्डा हुने गरेको छ । अहिले राप्रपा प्रजातान्त्रिकका नेता दीपक बोहोरा स्वास्थ्य मन्त्री छन् । नेपाली कांग्रेस नेतृत्वको सरकार भएकाले कांग्रेस र राप्रपाको सहमतीमा सचिव नियुक्त हुने छन् । मन्त्रालयका एक अधिकारीले भने, ‘तिनै जनाको उत्तिकै संभावना छ । जो पनि स्वास्थ्य सचिव नियुक्त हुन सक्छ । ’