मन्द बिष हो जंक फुड

डा. अरुणा उप्रेति

जंक फुड जिब्रोका लागि स्वाद भए पनि स्वास्थ्यका लागि उत्तिकै हानिकारक छ । बेफुर्सदीका लागि भान्छामा खाना पकाउनुको सट्टा एकछिनमै बजारमा किन्न पाइने जंक फुडले सजिलो र समयको बचत त गराएको छ तर त्यसले स्वास्थ्यमा दीर्घकालीन असरका विषयमा धेरैलाई जानकारी छैन । त्यसमा पनि बालबालिकाले खाने चाउचाउ, लेज, कुरकुरे, चिप्सजस्ता तयारी खानाले उनीहरूको स्वास्थ्यमा नराम्रो असर पर्छ । अहिले सहरिया मानिसहरूमा बढी रहेको मोटोपनको एक कारक तत्व नै जंक फुड हो । यसले शरीरमा पार्ने नकारात्मक असरहरू

१. जंक फुडले मानिसको शरीरमा कोलस्टोल बढ्छ । कोलस्टोल बढेपछि उच्च रक्तचाप बढ्ने र पछि यसले मुटु रोगको खतरा बढाउछ ।

२. जंक फुड मोटोपनको प्रमुख कारक तत्व हो । मोटोपन बढेपछि मुटु, मिर्गौला र कलेजोसम्बन्धी रोग लाग्छ ।

३. यसमा शरीरलाई आवश्यक पोषक तत्व पाइँदैन । यसले तत्कालका लागि भोक त शान्त पार्छ तर आवश्यक पोषक तत्व, कार्बोहाइटेडजस्ता तत्व पाइँदैन ।

४. जंक फुडले व्यक्तिको पाचन प्रणालीमा असर गर्छ । यस्ता खाद्यपदार्थ बढी तेलमा फ्राई गरिएका हुने भएकाले शरीरमा चिल्लो पदार्थको मात्रा बढी हुन्छ । चिल्लो पदार्थले एसिडिटीको समस्या आउँछ ।

५. जंक फुड रेसादार नहुने भएकाले खाद्य पदार्थ पच्न समस्या पैदा हुन्छ । यसले अल्छीपन ल्याउँछ ।

६. जंक फुड खाने बानी भएका बालबालिकालाई बिस्तारै घरमा पकाएको खानेकुरा खान मन लाग्दैन । घरको खानामा स्वाद नै लाग्दैन । भात र दालमा समेत कुरकुरे मिलाएर खाने गरेका बच्चा हामीले देखेका छौं ।

७. जंक फुडले व्यक्तिको दिमागको स्मरण शक्तिसमेत कम गर्छ । यसको प्रयोगले रगतमा चिनीको मात्रा उतारचढाव हुन्छ ।

८. यसको सेवनले पेटको समस्या हुन्छ । पेट सफा नहुने, कब्जियत हुने, डकार आउनेजस्ता समस्या देखिन्छन् ।