डा. रुईतलाई भारतको सम्मानित पद्म श्री प्रदान गरिने

हेल्थ टुडे

काठमाडौं : म्यागासेसे पुरस्कार बिजेता आखा रोग विशेषज्ञ डा. सन्दुक रुईतलाई भारत सरकारले पद्मश्री सम्मानबाट सम्मानित गर्ने भएको छ । तिलगंगा आखा प्रतिष्ठानका कार्यकारी डा.रुईतलाई प्रदान गरिने लागेको उक्त सम्मान भारतको चौथो ठूलो सम्मान हो । यो पुरस्कार अभिनेता अमिताभ बच्चन, गायक उदितनाराण झा लगायतले प्राप्त गरिसकेका छन् । यो पुरस्कार पाउने डा. रुईत पहिलो नेपाली आखा रोग विशेषज्ञ हुन । नेपाल सहित एशिया र अफ्रिकासम्मका दृष्टिविहीनलाई आखाको ज्योति छर्दै उल्लेखनिय योगदान गरेको भन्दै भारत सरकारले उनलाई यो सम्मान गर्ने निर्णय गरेको भारतीय सञ्चार माध्यमहरुले जनाएका छन ।

अन्धोपन निवारणमा डा. रुईतको महत्वपूर्ण योगदान छ । कम शुल्कमा मोतिबिन्दूको शल्यक्रिया गरेर हजारौ मानिसको गुमेको आखाको ज्योति फर्काएर उनले नेपाल सहित भारत, चीन, दक्षिण कोरिया र अफ्रिकामा आफूलाई एशियाकै अब्बल आखा रोग विज्ञको रुपमा सावित गरेका छन् । आर्थिक अभावका कारण दृष्टि गुमाएका विपन्न जनताका लागि उनले निशुल्क सेवा समेत दिएका छन् । आखा उपचारका क्षेत्रमा नेपाल सरकारले कुनै लगानी नगरेको अवस्थामा डा. रुईत सहितको समूहले आखा उपचारमा सफलता पाएको छ । सबै कुरा बिदेशबाट आयात गर्नु पर्ने अवस्थामा डा. रुईतकै पहलमा अहिले ३० वटा भन्दा बढी देशहरुमा मोतीविन्दू सम्बन्धी सर्जरी लेन्सहरु पठाउँदै आएको छ । उनले हरेक हप्ता २५ सय भन्दा बढी खर्च गर्न नसक्ने विरामीहरुलाई निशुल्क उपचार गराउँदै आएका छन् । एशिया र अफ्रिकाका एक लाख भन्दा बढी मानिसको गुमिसकेको आँखालाई पुनर्जि्वित गराईदिएका छन् । ताप्लेजुङा जन्मेका डा. रुईतले काठमाडौं आउन नसक्ने विपन्नहरुलाई दूर्गम भेगमा समेत पुगेर उपचार गर्ने गरेका छन् । उनले सञ्चालन गरेको तिलगंगा आखा प्रतिष्ठान आखा उपचारको क्षेत्रमा एशियामै उत्कृष्ठ अस्पतालको रुपमा लिइन्छ ।