हेल्थ टुडे,
लेले, ललितपुर ११ माघ : गोदावरी नगरपालिकाका प्रमुख गजेन्द्र महर्जनले आनन्दबन अस्पताल नगरपालिकाको गहना भएको बताएका छन् । ६६ औं विश्व कुष्ठरोग दिवसको पूर्व सन्ध्यामा शुक्रबार आनन्दबन अस्पताल लेलेमा आयोजना गरिएको बहुपक्षिय अन्तरक्रियामा मेयर महर्जनले देशभरिका सयौं कुष्ठरोगीलाई निशुल्क गुणस्तरीय सेवा प्रदान गरेर नगरपालिकाका लागि अस्पताल गहना भएको दावी गरे । अस्पतालले कुष्ठरोगको उपचारका अलावा सर्वसुलभ रुपमा हाडजार्नी सहित, बालरोग, प्याथोलोजी, फिजियो थेरापी लगायतका उपचार सेवा प्रदान गरिरहेकोले स्थानियवासी अस्पतालले दिने सेवाबाट लाभान्वित भइरहेको महर्जनले खुशी व्यक्त गरे । उनले भने, ‘ आनन्दबन अस्पतालसँग सहकार्य गरेर नगरपालिका अगाडि बढ्न चाहन्छ । ’
दी ल्याप्रोसी मिसन नेपालका कन्ट्री डाइरेक्टर शोभाकर कँडेलले आनन्दबन अस्पतालले अहिलेसम्म २० हजार भन्दा बढी कुष्ठरोगीको उपचार गरेको जानकारी गराउदै समाजिक र कानूनी भेदभाव अन्त्य नभएसम्म उनीहरुले सम्मानजनक जिवन निर्वाह गर्न नसक्ने दावी गरे । विहावारी सम्बन्धी कानूनमा कुष्ठरोगी भए विवाह बदर हुन सक्ने प्रवधान हटाउन पटक पटक पहल गरे पनि बेवास्ता गरेको कँडेलले बताए । दी ल्याप्रोसी मिसन नेपाल, आनन्दबन अस्पतालका तालिम प्रमुख गोपाल पोखरेलले भारतको संसदले यही जनवरी ७ तारिखमा नेपालको जस्तै विभेदपूर्ण कानूनी प्रवधान हटाएको जानकारी दिदै नेपाल सरकारले पनि तुरन्त यस किसिमका भेदभावपूर्ण कानून हटाउनु पर्ने बताए ।
कुष्ठप्रभावितहरुको संस्था आईडिया नेपालका अध्यक्ष अमर तिमिल्सिनाले कुष्ठ प्रभावितहरुले समाजमा लुकेर बस्नु भन्दा अगाडि आउनु पर्नेमा जोड दिए । कुष्ठरोग विशेषज्ञ डा. महेश शाहले कुष्ठरोग वंशानुगत रोग नभएको बताउदै सुरुकै अवस्थामा उपचार गराउन सके कुष्ठरोगबाट अंगभंग हुनबाट बचाउन सकिने बताए । कार्यक्रममा सञ्चारकर्मीहरुसँग अन्तरक्रिया पनि गरिएको थियो । दी लेप्रोसी मिसन नेपालले सञ्चालन गरिरहेको आनन्द बन अस्पतालमा ८० वेड कुष्ठरोगीका लागि निशुल्क छुट्याइएको छ भने ३० वेड हाडजोर्नी, बालरोग, प्याथोलोजी सहितको सेवा सहितको सशुल्क सेवा उपलब्ध छ ।
Leave a Reply