व्यवस्थापिका संसदमा केही सांसदहरुले चिकित्सा क्षेत्रलाई नै बदनाम गर्ने गरी मिर्गौला चोरी प्रकरणबारे अभिव्यक्ति दिएर घटनालाई अतिरञ्जित पार्न खोजेको भन्दै ती सासंदहरुलाई कारवाही गर्न नेपाल चिकित्सक संघले सभामुख समक्ष माग गरेको छ ।
नेपाल चिकित्सक संघको बुधबार बसेको आकस्मिक बैठकले चिकित्सा क्षेत्रलाई सांसदहरुले बदनाम गराउन खोजेको आरोप लगाएको छ । मनमोहन अस्पतालको घटना बिरामीको जीवन रक्षाको लागि भएको र चिकित्सा पद्धति अनुसार नै बिरामीको आफन्तको सहमतिमा मिर्गौला झिकिएकोले घटनालाई अतिरञ्जित बनाउने तथा चिकित्सा क्षेत्रलाई नै बदनाम गर्न खोज्ने गरी अभिव्यक्ति दिने सांसदहरुलाई कारवाहीको माग गर्दै सभामुख ओनसरी घर्ती मगरलाई ज्ञापन पत्र बुझाउने निर्णय संघले गरेको छ ।
संघका महासचिव डा. लोचन कार्कीद्वारा जारी गरिएको विज्ञप्तिमा उल्लेख गरिएको छ, ‘सभामुख ओनसरी घर्तीमगरलाई चिकित्सा क्षेत्रको वास्तविक स्थितिबारे अवगत गराउँदै संसदमा अनावश्यक रुपमा बोल्ने सांसदहरुलाई आवश्यक कारवाहीका लागि ज्ञापन पत्र बुझाउने निर्णय गरियो ।’
Leave a Reply