नयाँ स्वास्थ्य मन्त्री दीपक बोहोरा

राप्रपाका नेता दीपक बोहोरा नयाँ स्वास्थ्य मन्त्री भएका छन् । प्रधानमन्त्री शेरबहादुर देउवाले मंगलबार स्वास्थ्य मन्त्रीको जिम्मेवारीमा रहेका गिरिराजमणि पोखरेललाई विना विभागिय मन्त्री बनाएर बोहोरालाई स्वास्थ्य मन्त्रीको जिम्मेवारी सुम्पेका हुन ।

सत्ता घटक एमाओवादीले अगामी निर्वाचनमा एमालेसँग सत्ता गठबन्धन गरेपछि नेपाली कांग्रेस र एमाओवादी बिचको सत्ता गठबन्धन धरापमा परेको थियो । प्रधानमन्त्री देउवा एमाओवादी मन्त्रीहरु आफै राजिनामा दिएर बाहिर निस्कून भन्नेमा भएपनि एमाओवादीले सरकारमै रहिरहने आशक्ति देखाएपछि मंगलबार उनीहरुहरुलाई विना विभागिय बनाएर राप्रपाका मन्त्रीहरुलाई जिम्मेवारी सुम्पका हुन ।

निवर्तमान स्वास्थ्य मन्त्री पोखरेल मंगलबार दिउँसोसम्म आयुर्वेद दिवसको अवसरका आयोजना भएका विभिन्न कार्यक्रममा सरिक भएका थिए । तेश्रो पटक स्वास्थ्य मन्त्री भएका पोखरेलले स्वास्थ्यमा खासै नयाँ काम गर्न सकेनन् । पूर्व स्वास्थ्य मन्त्री गगन थापाले अगाडि बढाएको स्वास्थ्य विमा ऐन संसदबाट पारित गर्नुलाई नै उनले आफ्नो महत्वपूर्ण उपलब्धी मानेका छन । नव नियुक्त मन्त्री बोहोरा पटक पटक मन्त्री भइसकेका पाका नेता हुन ।