निधीको स्वास्थ्यमा क्रमिक सुधार

हेल्थ टुडे

पूर्व गृह मन्त्री एवं नेपाली कांग्रेसका नेता विमलेन्द्र निधीको स्वास्थ्य अवस्थामा क्रमिक सुधार भइरहेको उपचारमा संलग्न चिकित्सकले बताएका छन् । चुनावी धपेडीका कारण ज्वरो र सास फेर्न समस्या भएपछि सोमबार साझ निधीलाई चावहिलस्थित ओम हस्पिटल भर्ना गरिएको छ ।

निधीको उपचारमा संलग्न डा. राहुल पाठकका अनुसार उनको स्वास्थ्य अवस्थामा क्रमिक सुधार भइरहेको छ । उनको सबै परीक्षण गरिसकिएको र सबै रिपोर्ट आएपछि थप उपचार अगाडि बढाइने डा. पाठकले बताएका छन् । चिकित्सकहरुका अनुसार एक हप्ता अगाडि पनि उनलाई धपेडीका कारण ज्वरो र छातीमा केही समस्या देखिएको थियो । त्यति बेला एन्टिवोयोटिक दिइएको थियो । उक्त एन्टिवायोटिकले राम्रो काम नगरेपछि उनलाई अस्पताल भर्ना गरेर उपचार सुरु गरिएको हो ।

निधी धनुषा क्षेत्र नम्बर ३ बाट प्रतिनिधि सभा सदस्यका उम्मेदवार छन् । यो भन्दा पहिले ६ महिना पहिले पनि तनाव बढी भएपछि निधी ओम अस्पताल नै भर्ना भएका थिए । चुनावी दौडमा रहेका अधिकांश नेता तथा कार्यक्रर्ता अहिले दिनरात नभनि प्रचारप्रसारमा खटिएका छन् । चुनाव जित्नै पर्ने मानसिकताका साथ दौडधुप गर्दा तनाव बढ्ने, ज्वरो आउने, उच्च रक्तचाप बढ्ने र छातीको संक्रमण बढ्न सक्ने रहेको चिकित्सकहरु बताउछन् ।