हेल्थ टुडे
काठमाडौं, १० मंसिर : ललितपुरको सानेपामा रहेको स्टार हस्पिटलले आईतबारदेखि क्यान्सरका विरामीको सुविधाकालागि क्यान्सर सेन्टर सञ्चालन गरेको छ । भक्तपुरमा रहेको काठमाडौं क्यान्सर सेन्टरसँगको सहकार्यका स्थापना गरिएको उक्त ‘स्टार काठमाडौं क्यान्सर सेन्टर ’ को आईतबार महिला, वालवालिका तथा समाजकल्याण मन्त्री विक्रम थापाले भव्य समारोहबिच उद्घाटन गरेका हुन् ।
क्यान्सरका विरामीहरुलाई स्तरीय उपचार सेवा प्रदान गर्ने उद्देश्यले क्यान्सर सेन्टर सञ्चालन गरिएको हो । कार्यक्रममा स्टार हस्पिटलका प्रवन्ध निर्देशक डा.शैल रुपाखेती र काठमाडौं क्यान्सर सेन्टरका तर्फबाट मेडिकल डाइरेक्टर डा.सिमित सापकोटाले सम्झौतापत्रमा हस्ताक्षर गरेका थिए । केमो थेरापी बाहेकका अन्य क्यान्सर उपचार सेवा अब स्टार हस्पिटलमै उपलब्ध हुने हस्पिटलका प्रवन्ध निर्देशक डा. रुपाखेतीले बताए । केमो थरापी र गम्भिर किसिमका शल्यक्रिया गर्दा स्टारमा उपचार गराइरहेका विरामीको थप उपचार काठमाडौं क्यान्सर सेन्टरमा हुने छ । स्टार हस्पिटलका सिइओ डा.सन्देश जिसीले स्वदेशका अस्पतालहरुबिच सहकार्य गरेर अगाडि बढ्ने उद्देश्य अनुसार स्टार हस्पिटलमा क्यान्सर सेन्टर स्थापना गरेर सञ्चालन गरिएको बताए ।
कार्यक्रममा नेपाल स्वास्थ्य अनुसन्धान परिषद्का अध्यक्ष एवं क्यान्सर रोग विशेषज्ञ डा. अञ्जनीकुमार झाले स्टार हस्पिटल र काठमाडौं क्यान्सर सेन्टरबिच भएको सहकार्य ऐतिहासिक भएको बताए । सोसाइटी अफ सर्जनका अध्यक्ष डा. सिएल भट्टचनले स्टार हस्पिटलले सञ्चालनमा ल्याएको नयाँ क्यान्सर सेन्टरबाट कयौं क्यान्सरका विरामीले सर्वसुलभ उपचार सेवा पाउने विश्वास व्यक्त गरे । स्टार अस्पतालका अध्यक्ष बसन्तचन्द्र मरहट्टाले अस्पतालले सेवा सुविधा बिस्तार गर्दै गइरहेको जानकारी गराउँदै अस्पतालले भविश्यमा थप सेवा बिस्तार गर्ने बताए । १३३ शैया क्षमता रहेको स्टार हस्पिटलले अहिले ८ तले सुविधा सम्पन्न भवन निर्माण गरेको छ ।
Leave a Reply