ओठ बिग्रिनबाट जोगिन यसो गरौ

लोकराज भट्ट,

जाडो मौसम शुरु भए संगै प्राय मानिसहरुमा छाला,पैताला तथा अनुहार बिग्रिने समस्या हुने गर्छ । छाला लाई राम्रो र सुन्दर राख्न प्रयाप्त मात्रामा नरमपन र पानिको आवश्यकता पर्दछ । जाडोमा अधिकांश व्यक्तिहरुले पानि कम पिउने गर्दछन् त्यसैले अन्य मौसममा भन्दा जाडो मौसममा छाला बढी सुख्खा हुन्छ । ओठलाई कोमल तथा नरम राख्न मोस्चराइजर प्रयोग गर्न सकिन्छ । खानामा पर्याप्त मात्रामा भिटामिन बी समावेश गर्नुपर्छ । यसले ओठलाई पनि प्रभावित गर्छ । ओठको किनारा र मुखको कुना सुकेर फुट्ने गर्छ । भिटामिन बी को कमीले मुखमा अल्सर पनि हुनसक्छ । यस्तोमा ओठलाई स्वस्थ राख्न पर्याप्त मात्रामा भिटामिन बी सेवन गर्नुपर्छ ।

धूमपानले गर्दा ओठ कालो बनाउनुका साथै छाला बिग्रिने सम्भावना बढी हुन्छ । यसका लागि धूमपान छोड्नु फाइदा जनक हुन्छ । ओठलाई कोमल, नरम र चम्किलो बनाउन मह र कागतीको केही थोपा मिसाएर नियमित रूपमा ओठमा लगाउनुपर्छ । यसबाट ओठको रंग सुन्दर र ओठ कोमल हुन्छ । ओठमा ओलिभ ओयल, तोरीको तेल वा ल्वाङको तेल पनि लगाउन सकिन्छ ।

छालालाई असर गर्ने सूर्यबाट आउने अल्ट्राभ्वाइलेट रेज परावैजनी किरण बाट सुरक्षा दिन, सुख्खा र कालो हुनबाट जोगाउन बाम वा जेल प्रयोग गर्नु उपयुक्त हुन्छ । जाडोमा हामीले धेरै मात्रामा मोस्चराइजर भएको लिपस्टिक किन्दा राम्रो हुन्छ । कागतीमा प्राकृतिक ब्लिच हुने हुदा ओठलाई कालो हुनबाट जोगाउन कागती पनि प्रयोग गर्न सकिन्छ । सुत्नुअगाडि लिपिस्टिक हटाएपछि राम्रो खालको मोस्चराइजिङ लिप बाम लगाउनुपर्छ । ग्लिसरिन, अल्कोहलजस्ता केमिकल तत्व भएका बाम प्रयोग गर्दा उल्टो असर पनि पर्न सक्ने हुदा यस्ता तत्व प्रयोग गर्नु ठीक मानिदैन