विरामीसँग कर लिएकामा कारण देखाउ आदेश

हेल्थ टुडे

काठमाडौं, २८ मंसिर : सर्वोच्च अदालतले अस्पतालहरुले विरामीसँग लिने गरेको करका सम्बन्धमा कारण देखाउ आदेश जारी गरेको छ । प्रधानन्यायधिश गोपालप्रसाद पराजुली तथा न्यायधिशहरु दीपकराज जोशी, चोलेन्द्रसम्सेर जवरा,ओमप्रकाश मिश्र र दीपककुमार कार्कीको संवैधानिक इजलासले निजी अस्पतालहरुले विरामीबाट लिने गरेको मूल्य अभिवृदि कर ( भ्याट) र स्वास्थ्य सेवा करका बारेमा सरकारसँग कारण माग गरेको हो । अधिवक्ता विष्णुप्रसाद तिमिल्सिनासहितले गत साउन १६ गते अस्पतालहरुले उपचार बाफत बिरामीबाट कर लिने व्यवस्था संविधानको मौलिक हक बिपरित रहेकोले खारेज गर्नु पर्ने माग गर्दै सर्वोच्चमा रिट दायर गरेका थिए । रिटमा सुनवाई गर्दै सर्वोच्चले १५ दिन भित्र कारण पेश गर्न सरकारलाई आदेश दिएको हो ।