हेल्थ टुडे,
काठमाडौँ : त्रिभुवन विश्वविद्यालयले बर्खास्त गरेका डिन डा. शशि शर्मा चिकित्साशास्त्र अध्ययन संस्थानमा पुनर्बहाल भएका छन् । उनलाई कानुनविपरीत बर्खास्त गरिएको ठहर गर्दै सर्वोच्च अदालतले आइतबार पुनर्बहाली गर्न आदेश दिएको हो ।
चारवर्षे पदावधिका कारण आगामी बिहीबार उनको पदावधि सकिँदै छ । प्रधानन्यायाधीश गोपालप्रसाद पराजुली र न्यायाधीश दीपककुमार कार्कीको संयुक्त इजलासले सर्वोच्च अदालतले आइतबार शर्मालाई बर्खास्त गर्ने त्रिविको निर्णय उत्प्रेषणको आदेशबाट बदर गरिदिएको हो । पुस २७ गते सार्वजनिक बिदा भएकाले शर्माको कार्यकाल ३ दिन बाँकी छ ।
‘२०७० साल पुस २५ गतेको निर्णयअनुसारको निर्णय बदर गरी राकेश श्रीवास्तवलाई नियुक्त गरिएको कार्य,’ सर्वोच्चको संक्षिप्त आदेशमा भनिएको छ, ‘कानुन, विधि र प्रक्रियामा नगरिएका कार्यलाई निषेध गरी कानुनको शासन कायम गर्ने काममा अदालतको प्रमुख दायित्व भएकाले न्यायका मूल्यमान्यताविपरीत भएका कामकारबाहीमा विस्तृत तवरबाट निर्देशनात्मक आदेश जारी गरिएको छ ।’ शर्मालाई त्रिवि कार्यकारी परिषद्ले २०७० पुस २६ गते नियुक्त गर्ने निर्णय थियो । निर्णयको पर्सिपल्ट उनी नियुक्त भएकाले चारवर्षे कार्यकाल आगामी बुधबार सकिँदै छ । सर्वोच्चले ४ दिन कार्यकाल बाँकी भएका शर्मालाई बहाल हुन चाहेमा बहाल हुनु भनी आदेश दिनुका साथै तत्कालीन डिन राकेश श्रीवास्तवको नियुक्तिसमेत बदर गरिदिएको छ ।
कनिष्ठलाई डिन नियुक्त गरिएको र सम्बन्धनको खेल भएको भन्दै डा. गोविन्द केसीले थालेको अनशनले चिकित्सा क्षेत्र आन्दोलित भएपछि तत्कालीन मन्त्रिपरिषद्का अध्यक्ष एवं त्रिवि कुलपति खिलराज रेग्मीले शर्मालाई बर्खास्त गर्न निर्देशन दिएका थिए । त्यसविरुद्ध शर्माले सर्वोच्च अदालतमा रिट हालेका थिए । शर्माको कार्यकाल सकिएपछि डिनको व्यवस्थापनबारे अन्योल देखिएको छ ।
Leave a Reply