आईफोन किन्न मिर्गौला बेचेको सुने : लालबाबु

हेल्थ टुडे,

काठमाडौं, २४ फागुन : वातावरण तथा जनसंख्या मन्त्री लालबाबु पण्डितले मिर्गौला रोगीहरुको संख्या बढ्दै गएकोमा चिन्ता व्यक्त गर्दै यसलाई जोगाउन हरेक व्यक्ति सचेत हुनु पर्ने बताएका छन् । आईफोन किन्नका लागि आफ्नो मिर्गौला भारत गएर बेचेको घटना आफूले सुनेको स्मरण गर्दै मन्त्री पण्डितले आईफोन भन्दा जीवनको मूल्य ठूलो भएको बताए ।

विश्व मिर्गौला दिवसको अवसर पारेर मानव अंग प्रत्यारोपण केन्द्र भक्तपुर र आरोग्य प्रतिष्ठानले बिहीबार आयोजना गरेको कार्यक्रममा मन्त्री पण्डितले स्वदेशी अस्पताल र चिकित्सकमाथि विश्वास नगर्ने प्रवृतिलाई निरुत्साहित गर्नु पर्नेमा जोड दिए । उपचारका लागि करोडौ राज्यकोष खर्चेर विदेश जाने नेताहरुप्रति इंगित गर्दै मन्त्री पण्डितले केही नेताहरुलाई उपचारका नाममा भूत लागेकाले उनीहरुले यस्तो गर्ने गरेको दावी गरे । उनले भने, ‘ राज्यकोषको करोडौ रकम लिएर केही नेतालाई विदेशमा मात्र उपचार हुन्छ भन्ने भूत लागेको छ । त्यो भूत हटाएर स्वदशमै उपचार गर्ने परिपाटी विकास गर्नु पर्छ । ’ केही नेता सुगर टेष्ट गराउन समेत राज्यकोषको दुरुपयोग गर्दै सिंगापुर जाने गरेको स्मरण गर्दै यसलाई कडाईका साथ बन्द गरिनु पर्नेमा जोड दिए । उनले भने, ‘ राष्ट्रपतिदेखि प्रधानमन्त्रीले स्वदेशकै सके सरकारी अस्पतालमा नभए निजीमा भएपनि स्वदेशमै उपचार गर्नु पर्छ ।’

कार्यक्रममा विश्व स्वास्थ्य संगठनका नेपाल प्रतिनिधि जोस भेन्डालियरले मिर्गौला रोगको संक्रमण विश्वमै बढीरहेको तथ्य प्रस्तु गर्दै यसको जोखिम बढी महिलामा भएकाले त्यही अनुसार जनचेतनाका कार्यक्रम सञ्चालन गरिनु पर्नेमा जोड दिए । सर्वोच्च अदालतकी न्यायधिश सपना मल्ल प्रधानले मिर्गौला प्रत्यारोपणका क्षेत्रमा कानूनमा व्यापक परिवर्तन भएको स्मरण गर्दै कानूनसंग मानिसहरुकोे सोच परिवर्तन हुनु पर्ने अहिलेको आवश्यकता रहेको बताइन । महिलाको स्वास्थ्य अवस्था सुधार हुनका लागि हरेक महिला आर्थिक रुपमा सक्षम हुनु आवश्यक रहेको उनको भनाई थियो । कार्यक्रममा नेपालका लागि अष्ट्रेलियाका राजदुत पिटर बर्डले मिर्गौला प्रत्यारोपणका क्षेत्रमा नेपालले गरेको प्रगति सन्तोषजनक भएको बताउदै अंगदानलाई व्यापक बनाउनु पर्नेमा जोड दिए । उनले आफुले अंगदान गरेको घोषणा गर्दै जनचेतना बिस्तारमा सबै मिलेर लाग्नु पर्ने आवश्यकता औल्याए ।

मानव अंग प्रत्यारोपण केन्द्र भक्तपुरका कार्यकारी निर्देशक डा.पुकारचन्द्र श्रेष्ठले पुरुषको तुलनामा  मिर्गौला रोगको जोखिममा महिला बढी रहेको बताउदै पुरुषले उपचार गराइहाल्ने तर महिलाको उपचारमा लापरवाही गर्ने प्रवृति हटाउनु आवश्यक रहेकोमा जोड दिए । त्यसैगरि नवौं प्रत्यारोपण खेलकुदका विजयी खेलाडीहरुलाई पुरस्कार प्रदान गरिएको थियो । मिर्गौला प्रत्यारोपण गरेका व्यक्तिहरु र चिकित्सक, राजनीतिककर्मी, पत्रकारबिच भएको मैत्रीपूर्ण फुटबलमा प्रत्यारोपण गराएका व्यक्तिहरुको टीम बिजयी भएको थियो । कार्यक्रममा गोरखापत्रका समाचारदाता सरोज ढुंगेललाई सम्मान गरिएको थियो । महिला दिवस र मिर्गौला दिवस यो वर्ष एकै दिन परेको हो । सोही दिवसको अवसरमा केन्द्रले आयोजना अंगदान सिविरमा एमाओवादी नेतृ एवं ललितपुर ३ की सभासद् पम्फा भूसाल र ललितपुर महानगरपालिकाकी उपमेगर गीता सत्याल सहित दुई दर्जनले अंगदान घोषणा गरेका थिए । कार्यक्रममा निशुल्क मिर्गौला परिक्षण सिविर समेत सञ्चालन गरिएको थियो ।