भोलीदेखि स्वास्थ्य तथा जनसंख्या वैज्ञानिकको चौथो शिखर सम्मेलन

हेल्थ टुडे,

काठमाडौं : भोलीदेखि राजधानीमा स्वास्थ्य तथा जनसंख्या वैज्ञानिकको चौथो शिखर सम्मेलन हुने भएको छ । “नेपालको बदलिदो स्वास्थ्य प्रणालीको लागि उच्च स्तरीय अनुसन्धान” भन्ने नाराका साथ नेपाल स्वास्थ्य अनुसन्धान परिषद्ले विगत वर्षहरु झै यो वर्ष पनि शिखर सम्मेलन आयोजना गर्न लागेको हो । दुई दिनसम्म चल्ने सम्मेलनका बिषयमा जानकारी गराउन परिषद्ले मंगलबार आयोजना गरेको पत्रकार सम्मेलनमा नेपाल स्वास्थ्य अनुसन्धान परिषद्का अध्यक्ष प्रा. डा. अञ्जनीकुमार झाले सम्मेलनमा स्वास्थ्य तथा जनसंख्यासंग सम्बन्धित विषयमा अनुसन्धानकर्ताहरुले खोज अनुसन्धान गरेका ६५ वटा कार्यपत्र प्रस्तुत गरिने जानकारी दिए । उनले भने, ‘ तिनीहरु मध्ये विज्ञहरुबाट संघियतामा स्वास्थ्य अनुसन्धान, नेपालमा सञ्चालन भइरहेका स्वास्थ्य अनुसन्धान सम्बन्धि गतिविधि, नसर्ने रोग र गरिबीका बिषयमा आमन्त्रित ८ जना विज्ञहरुका प्रस्तुतिकरण पनि हुने छन् । ’ सम्मेलनमा जनसंख्या र स्वास्थ्यका क्षेत्रमा खोज अनुसन्धान गरिरहेका देश भरिका करिव एक हजार अनुसन्धानकर्ता र विज्ञहरु सहभागि हुने डा. झाले बताए । सम्मेलनमा ७ जना अनुसन्धानकर्तालाई उत्कृष्ठ अनुसन्धानकर्ताको अवार्ड प्रदान गरिने छ । सम्मेलनबाट प्राप्त सुझावहरु नीति निर्माण, योजना तर्जुमा, कार्यक्रम विकास र मूल्यांकनका लागि उपयोगी हुने केन्द्रका वरिष्ठ अनुसन्धाकर्ता डा. मेघनाथ धिमालले बताए । सम्मेलनमा ६७ वटा पोस्टरको समेत प्रस्तुतिकरण हुनेछ । सम्मेलन बबरमहलस्थित कार्की बैंकटमा हुने छ ।