४४ जनाको निःशुल्क आँखाको शल्यक्रिया

हेल्थ टुडे,
काठमाडौं,२७ चैत्र : नेपाल आँखा अस्पतालले ४४ औं वार्षिक उत्सवको अवसरमा सोमबार राजधानीमा ४४ जनाको निःशुल्क आँखाको शल्यक्रिया गरेको छ । चार दशकअघि वीर अस्पतालको ६ बेडबाट शुरु भएको आँखा स्वास्थ्य सेवा अहिले त्रिपुरेश्वरको आफनै भवनमा  ६ शल्यकक्ष र १० जना आँखारोग बिशेषज्ञ कार्यरत छन् । ग्रामीण भेगका बिपन्न बिरामीहरुको लागी निःशुल्क शिविर चलाउनुका साथै वृद्धवृद्धा र अपांगता भएका व्यक्तिलाई २५ प्रतिशत सम्म छुट दिने र गरीब बिपन्न बिरामीलाई नि:शुल्क उपचार गर्दै आईरहेको छ । उपचार सेवा सँगै अस्पतालले नेत्र रोग सम्बन्धी विभिन्न स्तरको पढाई पनि सञ्चालन गर्दै आईरहेको  छ  ।  अगामी दिनमा पनि गरिब विपन्नलाई केन्द्रमा राखेर सेवा विस्तार गरिने अस्पतालका कार्यकारी निर्देशक दमन घलेले बताए । घलेले भने, ‘यसका लागि स्वास्थ्यकर्मीलाई अझै दक्ष बनाउन तालिम दिने र भौतिक पूर्वाधार जुटाउने तयारी भइरहेको छ ।’ हाल अस्पतालमा अकुलोस्लास्टी, जलविन्दु, मोतीविन्दु र अल्पदृष्टि समस्याका विशेष सेवा छन् । अस्पतालले यस वर्ष मात्रै करिब ५ हजारलाई आँखाको शल्यक्रिया सेवा प्रदान गरेको छ भने एक लाखलाई उपचार सेवा दिएको छ । अगामी दिनमा अस्पतालले राजधानीमा चार भिजन सेन्टर स्थापना गर्ने लक्ष्य राखेको निर्देशक घलेले बताए ।