सामान्य औषधि समेत स्वास्थ्य संस्थामा नहुँदा सेवाग्राहीमा मारमा

हेल्थ टुडे,

नुवाकोट, १३ जेठः ककनी गाउँपालिका–८ स्थित थानसिङ स्वास्थ्य चौकीमा औषधि अभाव भएको छ । जिल्ला जनस्वास्थ्य र गाउँपालिकाका कार्यालयले आवश्यक औषधि नपठाउँदा औषधि अभाव भएको स्वास्थ्य चौकीका इञ्चार्ज सुरेश गैरेले बताउनुभयो । इञ्चार्ज गैरैका अनुसार स्वास्थ्य चौकीमा नियमित हुनु पर्ने ११ थरीका औषधि छैनन ।
स्वास्थ्य चौकीमा आँखामा राख्ने औषधि सिप्रो, पेट दुखेको बेला खाने ट्याबलेट वुसकोवान, उल्टी रोक्ने मेटोक्लोरोप्रामाइड, एभिल सुई, डाइजिन ट्याबलेट, भिटामिन बी कम्प्लेक्स, कालामाइन लोसन लगायत औषधि नभएको इञ्चार्ज गैरैले जानकारी दिनुभयो ।
सामान्य औषधि समेत स्वास्थ्य संस्थामा नहुँदा सेवाग्राहीमा मारमा परेका छन् । स्वास्थ्य संस्थामा सेवा उपलब्ध नहुँदा यहाँका तीन घण्टाको दूरीमा अवस्थित ककनी प्राथमिक स्वास्थ्य चौकी वा थानसिङको छहरेमा रहेको निजी स्वास्थ्य क्लिनिकमा मानिस धाउन बाध्य भइरहेको स्थानीय बासीले बताएका छन् ।
ककनी गाउँपालिका – ८ का वडाअध्यक्ष तथा स्वास्थ्य संस्था व्यवस्थापन समितिका अध्यक्ष शेषमान लामाले स्वास्थ्य चौकीलाई सधँै आवश्यक पर्ने र जिल्लाबाट नआउने औषधिको सूची बनाएर किन्नका लागि वडा कार्यालयले पनि पहल गर्ने बताउनुभयो । उहाँले सरकारले तोकेका स्वास्थ्य चौकीमा निशुल्क वितरणको औषधि ३८ थरीको सूचीभन्दा बाहेक स्थानीय बासीको माग धेरै भएका औषधि खरिद गरी निशुल्क वितरण गर्ने तयारी भएको जानकारी दिनुभयो ।