स्वास्थ्य इकाइ स्थापनासंगै स्वास्थ्यचौकी पुग्नुपर्ने झन्झटबाट मुक्त

कञ्चनपुर, १० साउनः स्वास्थ्य उपचारका लागि दश किलोमिटर टाढाको स्वास्थ्यचौकी पुग्नुपर्ने झन्झटबाट शुक्लाफाँटा नगरपालिका– ८ बेलडाँडीका बासिन्दाले मुक्ति पाएका छन् ।
स्थानीय सरकार आएपछि गाउँमै सामुदायिक स्वास्थ्य इकाइ स्थापना भएकाले स्थानीय बासिन्दाले सहज रुपमा स्वास्थ्य सेवा पाउन थालेका हुन् । स्वास्थ्यकर्मीसहित इकाइमा प्रर्याप्त औषधिको व्यवस्था गरिनाका साथै गाउँघर क्लिनिकलाई स्तरोन्नति गरी सामुदायिक स्वास्थ्य इकाइ बनाइएको हो ।
सामान्य ज्वरो आउँदा वा चोटपटक लाग्दा पनि टाढाको झलारीमा रहेको स्वास्थ्य चौकीमा पुग्नु पर्दथ्यो, गाउँमै स्वास्थ्यकर्मी सहित औषधिको व्यवस्था मिलाइएपछि निकै सहज भएको बताउनुहुन्छ स्थानीय बमबहादुर डगौरा ।
बस्तीलाई तीनैतीर नदीले घेरिएको र वर्षाका बेला गाउँमा बिरामी भए नदीमा आउने बाढीले नदी तर्न कठिन नसक्दा उपचारबाट पनि वञ्चित हुनुपर्ने अवस्था थियोे तर अहिले त्यस्तो अवस्था रहेन स्थानीय सुनिता नागरीले बताउनुभयो ।
इकाइमा उपचारका लागि नगरपालिकाको पिल्लरी र बेलडाँडीका बासिन्दा मात्रै नभएर छिमेकी कृष्णपुर नगरपालिकाको दोमिल्ला, पहरिया र सुन्दरी फाँटाका बासिन्दासमेत यहाँ उपचारका लागि पुग्ने गरेको इकाइमा कार्यरत अहेब डम्बरदत्त जोशीले बताउनुभयो ।
उहाँका अनुसार दैनिक २० देखि ४५ जनासम्म बिरामी उपचारका लागि आउन थालेका छन् । इकाइ स्थापनाले अशक्त, अपांगता भएका व्यक्ति, असहाय, बालबालिका, महिला र ज्येष्ठ नागरिक बढी लाभान्वित भएका छन् ।
इकाइमा जनशक्तिको अभाव पूर्ति गर्नका लागि चाडै सहयोगी सहित स्वास्थ्यकर्मीको व्यवस्था गर्न लागिएको वडाअध्यक्ष बहादुर महराले बताउनुभयो । इकाइ हाल समुदायले निर्माण गरेको कच्ची घरमा सञ्चालन हुँदै आएको छ । इकाइका लागि पक्की भवन निर्माणको कार्यसमेत शुरु गरिएको छ ।
रासस