हेल्थ टुडे,
काठमाडौं : स्वास्थ्य पर्यटनको विकास गर्ने उद्देश्यका साथ पहिलो पटक आयोजना गरिएको ‘मेडिकल टुरिजम एशिया एक्स्पो’ सम्पन्न भएको छ । एक्स्प्लोर प्रोडक्टिभ चेम्बर अफ कमर्श नेपालको आयोजनामा यही साउन २१ र २२ गते राजधानीको कार्की बैंक्वटमा आयोजना भएको एक्स्पोमा नेपालसहित भारत, बंगालादेश, सिंगापुर,थाइल्याण्डका अस्पताल र औषधि कम्पनीहरुले आफ्नो सेवा र उत्पादन सम्बन्धी स्टल राखेका थिए । एक्स्पोको दोश्रो दिन नेपालमा स्वास्थ्य पर्यटनका बिषयमा सरोकारवालाहरुबिच वृहत छलफल गरिएको थियो । कार्यक्रममा स्वदेश र विदेशका विज्ञहरुले विभिन्न कार्यपत्र प्रस्तुत गरेका थिए । समापन कार्यक्रममा बोल्दै नेपाल चिकित्सक संघका अध्यक्ष डा. मुक्ती श्रेष्ठले उपचारका लागि विदेश जानु पर्ने अवस्था सदाका लागि बन्द हुनु पर्नेमा जोड दिए ।
नेपाल मेडिसिटी हस्पिटलका अध्यक्ष उपेन्द्र महतोले स्वदेशमै गुणस्तरीय उपचार सेवा उपलब्ध गराउने अभियानका साथ आफू लागिपरेको दाबी गर्दै यस किसिकमा एक्स्पोले नेपालका विरामी विदेश जान अभिप्रेरित गर्न नहुने बताए । सहिद धर्मभक्त राष्ट्रिय प्रत्यारोपणकेन्द्रका कार्यकारी निर्देशक डा. पुकारचन्द्र श्रेष्ठले सबैको सहयोग र सहकार्य भए प्रत्यारोपण मार्फत नेपाललाई स्वास्थ्य पर्यटनको केन्द्र बनाउन सकिने बताए । आयोजक एक्स्प्लोर प्रोडक्टिभ चेम्बर अफ कमर्श नेपालका अध्यक्ष कृष्ण पाण्डेले एक्स्पोले भविश्यमा पनि निरन्तरता पाउने बताए । एक्स्पोका प्रबन्धक अर्जुन चन्दले कार्यक्रम सफल बनाउन सहयोग गर्ने सबैलाई धन्यवाद ज्ञापन गर्दै भविश्यमा पनि सहयोग र सहकार्यको लागि आग्रह गरेका थिए ।
Leave a Reply