कैलालीमा एचआईभीका कारण ७ जनाको ज्यान गयो  

सलिना सेठ्ठी ,     

धनगढी, माघ १८ :  केही बर्ष यता सुदुरपश्चिम प्रदेशमा एचआइभी संक्रमण घटे पनि संक्रमितको वेवास्ताका कारण ज्यान गुमाउनको संख्या भने बढेको छ । चालु आर्थिक बर्षको ६ महिनामै एचआईभीका कारण ७ जनाको ज्यान गएको छ । नियमित औषधि सेवनको अभाव र एचआइभी संक्रमितसँग खुलेर आउने वातावरणको सिर्जना हुन नसक्दा ज्यान जानेको संख्यामा वृद्धि भएको हो । नियमित औषधिको सेवन नगर्दा र निकै पछि जाँचका लागि आएका कारण धेरैको मृत्यु भएको छ । कैलालीको सेती अञ्चल अस्पतालमा सन् २००६ देखी हालसम्म २८ सयको हाराहारीमा संक्रमित फेला परेकोमा ७८० जनाले नियमत एआरटी सेवा लिइरहेको र २ सय ४ जनाको ज्यान गईसकेको सेति अञ्चल अस्पतालमा रहेको एआरटि सेन्टरका प्रमुख लोकराज पनेरुले जानकारी दिए ।

‘ज्यान गुमाउनेमध्ये अधिकांश संक्रमितको औषधी सेवन नगरेकै कारण मृत्यु हुने गरेको छ,’ पनेरुले भने, उपचारको पहुँचमा आएकाहरु पनि नियमित औषधि सेवन गरिरहेका छैनन् ।’ कैलालीमा आर्थिक बर्ष २०७२ । ०७३ मा १०४ जना संक्रमित फेला परेका थिए । ०७३ । ०७४ मा १७ र सन् २०१७ मा १३ जनाको मृत्यु भएको थियो । नेपालमा ३१ हजार भन्दा बढि एचआइभी संक्रमित रहेको तथ्याङ्क छ । अझै पनि संक्रमितलाई समाजमा खुलेर आउने बातावरण सृजना हुन नसकेको संक्रमितहरुको गुनासो छ । यति मात्रै होइन, संक्रमितलाई आफ्नो भावी सन्ततीको भविष्यप्रति अझ बढि चिन्ता छ ।

स्वदेशमा रोजगारीको अवसर नपाएर भारत जाने र त्यहाँ असुरक्षित यौन सम्पर्क गरेर संक्रमित हुने गरेको एकजना सहजकर्ता जयलक्ष्मी नेपालीले बताईन् । यसतर्फ स्वयम् सचेत हुन जरुरी रहेको उनले बताईन् । कैलालीको धनगढी, टिकापुर र मालाखेतीबाट १ हजार बढि एचआइभी संक्रमितहरुले नियमित रुपमा औषधि सेवन गरिरहेका छन् नेपाल र भारतको खुल्ला सिमा अनि मौसमी कामका लागी भारत तथा वैदेशिक रोजगारीका लागि जाने यूवाहरुका कारण एचआईभी संक्रमितको संत्रास रोकिन सकेको छैन । सुदूरपश्चिममा एचआइभी संक्रमितहरु सबैभन्दा बढी कैलाली, अछाम र डोटीमा छन् ।