क्षयरोगीको अवस्था पत्ता लगाउन सुरु गरिएको सर्वेक्षण अन्तिम चरणमा

काठमाडौ,१४ फागुन । क्षयरोगीहरुको अवस्था पत्ता लगाउन नेपालमा पहिलो पटक शुरु गरिएको प्रारम्भिक सर्वेक्षण अन्तिम चरणमा पुगेको छ । करिब ८० प्रतिशत काम सम्पन्न गरिसकेको र आउँदो वैशाखसम्म क्षयरोगको अध्ययन सम्पन्न गरिने  केन्द्रले जनाएको छ । राष्ट्रिय क्षयरोग केन्द्रका निर्देशक डा. भिमसिंह तिंकरीले देशैभर शुरु गरिएको राष्ट्रिय अध्ययन अन्तिम चरणमा पुगेको जानकारी दिए ।

नेपालमा क्षयरोगीको अवस्था कस्तो छ ? वार्षिक कति सङ्ख्यामा नयाँ क्षयरोगी पत्ता लाग्ने गर्दछन ? शङ्कास्पद क्षयरोगी कहाँ उपचार गर्दछन ? साथै, सन् २०३० सम्म नेपाललाई क्षयरोग उन्मुलन गर्नको लागि के चुनौती छन् ? भन्ने उद्देश्यले अध्ययन सुरु गरिएको हो ।

केन्द्रले आगामी अप्रिलसम्ममा सर्भेको सम्पूर्ण प्रतिवेदन आइसक्ने र नोभेम्बर २०१९ सम्ममा प्रतिवेदन सार्वजनिक गरिने जानकारी दिएको छ ।

विश्व स्वास्थ्य सङ्गठनले नेपालमा प्रतिवर्ष ४५ हजार क्षयरोगका नयाँ बिरामी थपिने गरेको अनुमान गरेको छ । राष्ट्रिय क्षयरोग केन्द्रले भने वार्षिक ३२ हजार नयाँ बिरामी मात्र पत्ता लगाउने गरेको छ ।