हेल्थ टुडे,
डोल्पा,१६ बैशाखः डोल्पाबासीहरु उपचार गर्न आउँदा आफै जेनेरेटर बोकेर अस्पताल आउने गरेका छन् । जिल्ला अस्पतालमा एक्सरे मेसिन चल्ने पर्याप्त बिजुली नहुँदा रोग पहिचानका लागि डोल्पाबासीहरु आफै जेनेरेटर बोकेर उपचारको लागि अस्पताल आउन बाध्य भएका हुन् ।
बिरामीका आफन्तले जेनेरेटरको व्यवस्था गरेपछि मात्रै अस्पतालले एक्सरे गरिदिन्छ। बजारबाट प्रतिघण्टा पाँच सय रुपैयाँ भाडामा जेनेरेटर ल्याउने गरेको स्थानीय बासिन्दाको दुःखेसो छ । अधिकांश बिरामीले भाडामा जेनेरेटर लिएर एक्सरे गराउने गरेको लामो समय हुँदा पनि अस्पताल व्यवस्थापन समितिले यसतर्फ ध्यान नदिएको डोल्पाबासीको गुनाशो छ ।
उनीहरुले पाँच सयदेखि एक हजारसम्म भाडा तिरेर एक्सरेका लागि जेनेरेटर ल्याउने गरेका छन् । बिरामीका आफन्तले जेनेरेटर ल्याउने गरेको एक्सरेका कर्मचारी लालकृष्ण बुढाले बताए । सोलार बत्तीको पावरले नपुग्दा बिरामी आफैंले विद्युत्तको व्यवस्थापन गर्नुपरेको बुढाको भनाइ छ।
सामान्य एक्सरे गर्न एक बिरामीले एक्सरे चार्जबाहेक दुई हजारदेखि चार हजारसम्म खर्च गर्नुपर्ने बाध्यता छ । अस्पतालमा चिकित्सक भए पनि आवश्यक प्राविधिक उपकरण नहुँदा सेवा प्रवाह प्रभावकारी हुन सकेको छैन् । बिरामी र बिरामीका आफन्त मारमा परेका छन् ।
Leave a Reply