७ बुँदे सहमतिपछि वीपी स्वास्थ्य विज्ञान प्रतिष्ठानका इन्टर्न डाक्टर काममा फर्किए

हेल्थ टुडे,
धरान,२१ जेठः तलब बृद्धिको माग गर्दै एक सातादेखि धर्ना बसेका धरानस्थित वीपी कोइराला स्वास्थ्य विज्ञान प्रतिष्ठानका इन्टर्न डाक्टरहरु आन्दोलन स्थगित गरेर काममा फर्किएका छन् । आइतबार राति अस्पताल प्रशासनले माग पुरा गर्ने प्रतिबद्धता ब्यक्त गरेपछि आन्दोलन स्थगित गरेर उनीहरु काममा फर्किएका हुन् ।

११ हजार ८ सय पारिश्रमिक पाउदैँ आएका करिब ५ सय इन्टर्न डाक्टर १८ हजार तलबको माग गरेर आन्दोलनमा उत्रिएका थिए । आइतबार अबेर प्रतिष्ठानका उपकुलपति प्रा.डा.राजकुमार रौनियारले माग पुरा गर्ने सहमति गरेका छन् । डाक्टरहरुका माग बारे छलफल गर्न डा.ज्ञानेन्द्र मल्ल,डा.पारस पोखरेल र डा.नारायण भट्टराइसहितको टोली बनेको थियो ।

उनीहरुले ७ बुदे सहमति तयार गरेका थिए । सहमति अनुसार असारसम्म १५ हजार तलब र नयाँ आर्थिक वर्ष सुरु भएपछि १८ हजार रुपैयाँ कायम गर्ने सहमति भएको छ । प्रतिष्ठानमा झण्डै ५ सय इन्टर्न डाक्टरहरु रहेका छन् । ४ वर्ष कोर्ष पुरा गरेपछि उनीहरुले इन्टर्न गर्नुपर्ने हुन्छ ।