बाढी प्रभावित क्षेत्रमा स्वास्थ्य सेवा सुरु,तराईका तीन स्थानमा छुट्टै एकाइ सञ्चालन

हेल्थ टुडे,
काठमाडौ,३० असारः गृह मन्त्रालयसँंगको सहकार्यमा स्वास्थ्य तथा जनसङ्ख्या मन्त्रालयले बाढी प्रभावित क्षेत्रमा स्वास्थ्य सेवालाई तिव्रता दिएको छ । बाढी,पहिरो तथा डुबानपछि हुनसक्ने सम्भावित स्वास्थ्य जोखिमबाट बच्न स्वास्थ्य मन्त्रालयले प्रदेश तथा स्थानीय निकायसंँगको समन्वयमा स्वास्थ्य सेवा सुरु गरेको हो ।

बाढीपछि हुनसक्ने महामारीजन्य रोग रोकथामका लागि मन्त्रालयले मातहतका निकायलाई तयारी अवस्थामा रहन निर्देशनसमेत दिएको छ । वर्षायाममा झाडापखाला, डेँगु, भाइरल, आउँ, हैजाको महामारी फैलिनसक्ने भन्दै बाढी तथा डुबानको समयमा त्यो जोखिम उच्च रहेकोले न्युनिकरणको लागि मन्त्रालयले स्वास्थ्य सेवालाई तिव्रता दिएको हो ।

मन्त्रालयले बाढीपहिरोको कारण विस्थापितहरूका लागि तराईका तीन स्थानमा छुट्टै एकाइ सञ्चालन गरेर औषधि उपचारको व्यवस्था गर्न लागेको छ । मन्त्रालयले बारा, पर्सा र रौतहट जिल्लाका बाढीपीडितको स्वास्थ्य अवस्था हेर्ने गरी पथलैयामा स्वास्थ्य एकाइ राखेको छ । उक्त केन्द्रमा चिकित्सक सहितको स्वास्थ्यकर्मी टोली रहने र टोलीले बाढीबाट प्रभावित क्षेत्रको अवस्था बुझ्ने, रोग रोकथाममा जनचेतना फैलाउने र उपचारसमेत गर्नेछ ।

यस्तै, सिराहा र सप्तरी जिल्ला हेर्ने गरी लहानमा स्वास्थ्य एकाइको स्थापना गरेको छ । अर्को सर्लाही, धनुषा र महोत्तरीलाई समेट्ने गरी बर्दिबासमा स्वास्थ्य ईकाइको स्थापना गरिएको छ ।

मन्त्रालयले यसअघि नै विपद् प्रकोप पूर्वतयारी, समन्वय तथा व्यवस्थापनका लागि आपत्कालीन सम्पर्क व्यक्ति तोकिसकेको छ । सम्पर्क व्यक्तिले सम्बन्धित क्षेत्रका निकाय र अधिकारीसँग समन्वय गरेर महामारी सम्भावित क्षेत्र पहिचान गरी आवश्यक औषधि र स्वास्थ्यकर्मीको अवस्था यकिन गरेर तत्काल आवश्यक पर्ने सहयोगको प्रबन्ध गर्नुपर्ने छ ।