डडेल्धुरा अस्पतालको अबरुद्ध स्वास्थ्य सेवा सञ्चालन

हेल्थ टुडे,
डडेल्धुरा,१ साउनः अस्पतालमा तोडफोड र चिकित्सकमाथी हातपात भएपछि केही दिनदेखि आकस्मिकबाहेकका सबै सेवा ठप्प रहेको डडेल्धुरा अस्पताल मंगलबारदेखि पुनः सञ्चालनमा आएको छ । काममा खटिएका चिकित्सकमाथि भएको आक्रमणको विषयलाई लिएर अस्पतालका चिकित्सकले यही असार २५ गते बुधबारदेखि डडेल्धुरा अस्पतालको आकस्मिकबाहेकका सबै सेवा ठप्प पारेका थिए ।

बहिरङ्गलगायत सबै सेवा बन्द गरी सुरक्षाको माग गर्दै ११ जना चिकित्सकले सुदुरपश्चिम प्रदेशका मुख्यमन्त्री त्रिलोचन भट्ट र सामाजिक विकासमन्त्री कृष्णराज सुवेदीलाई भेट गरी आफ्ना समस्या राखेका थिए । मुख्यमन्त्री भट्ट र सामाजिक विकासमन्त्री सुवेदीले चिकित्सकको सुरक्षा र दोषीलाई कारवाही गरिने आश्वासन दिएपछि आन्दोलनमा रहेका चिकित्सक मंगलबारदेखि नियमित काममा फर्किएका हुन् ।

दोषीलाई कारवाही हुने र चिकित्सकमाथि आक्रमण गर्नेमध्ये एकजनालाई प्रहरीले नियन्त्रणमा लिएपछि चिकित्सक पुनः नियमित सेवामा फर्किएका अस्पतालका निमित्त प्रमुख डा जीतेन्द्र कँडेलले जानकारी दिए ।