हेल्थ टुडे,
काठमाडौ,१६ साउनः बहुचर्चित राष्ट्रिय चिकित्सा शिक्षा आयोगको उपाध्यक्ष बन्नको लागि ११ जना डाक्टरले दरखास्त दिएका छन् । खुल्ला प्रतिस्पर्धाबाट उपाध्यक्ष नियुक्त गर्न सरकारले गठन गरेको सिफारिस समिति समक्ष उनीहरुले दरखास्त दिएका हुन् । समितिले पहिलो पटक निकालेको सूचना समयावधिमा दरखास्त दिएकाहरुको दरखास्त रद्ध गरि नयाँ सूचना निकालेर साउन १५ गतेसम्मको म्याद तोकेको थियो ।
स्रोतका अनुसार अघिल्लो पटक अयोग्य भन्दै दरखास्त नै रद्धमा परेका प्राडा श्रीकृष्ण गिरि, प्राडा रमेशप्रसाद सिंह, डा निलमणि उपाध्याय, प्राडा पारसकुमार पोखरेल र प्राडा प्रमोदकुमार शर्माले पुनः दरखास्त दिएका छन् । यस्तै, दरखास्त दिने नयाँ अनुहारमा प्राडा सुरेन्द्र शेरचन, प्राडा शम्भुकुमार पहारी, प्राडा जेएन पाण्डे हिमाली, प्राडा यहुनचन्द्र सिवाकोटी, प्राडा तरुण पौडेल र प्राडा राजेन्द्रप्रसाद साह रहेका छन् ।
गत चैत ४ गते बसेको आयोगको पहिलो बैठकले लोकसेवा आयोगका अध्यक्ष उमेशप्रसाद मैनालीको संयोजकत्वमा आयोगको कार्यकारी अधिकार रहने उपाध्यक्ष नियुक्तिका लागि सिफारिस समिति गठन गर्ने निर्णय गरेको थियो। राष्ट्रिय चिकित्सा शिक्षा ऐनअनुसार सिफारिस समितिमा लोकसेवा आयोगको अध्यक्ष संयोजक रहने व्यवस्था छ।
Leave a Reply