ड्युटी सकेर फर्कदै गरेका त्रिवि शिक्षण अस्पतालका डाक्टरमाथि प्रहरीको कुटपिट

हेल्थ टुडे,
काठमाडौं, ४ चैत : ड्युटी सकेर फर्कदै गरेका त्रिवि शिक्षण अस्पतालका डाक्टरमाथि प्रहरीले कुटपिट गरेको छ । लकडाउनका बेला अस्पतालबाट ड्युटी सकेर डेरातर्फ जाने क्रममा तीनजना चिकित्सकहरुमाथि प्रहरीले जानाजान कुटपिट गरेका हुन ।
अस्पताल परिसरबाट कान्ति अस्पताल हुँदै डेरामा जाने क्रममा प्रहरीले कुटपिट गरेको डाक्टरहरुले बताएका छन । डेरा नजिकै पुग्न लागेको बेलामा भ्यानमा आएका प्रहरीले सोधपुछ गरेको र अस्पतालबाट ड्युटी सकेर डेरा फर्कन लागेका डाक्टर हौ भनेर परिचय दिँदा प्रहरीले लाठीले डाक्टर साक्टर चिन्दैन भन्दै लाठी चार्ज गरेको डाक्टरहरु बताउँछन ।
प्रहरीले डा.शम्भु खनाल, डा.तेजप्रकाश साह र डा. विकास शाहमाथि आक्रमण गरेको हो । प्रहरीले लाठीले प्रहार गर्दा डा.तेजप्रकाश साहको ढाड र हातमा चोट लागेको छ । चोटपछि उनको अस्पतालमा एक्सरे गरिएको छ । एक्सरे क्रममा भाँचिएको अवस्था भने देखिएन तर सुन्निएको र रातो दाग रहेको डाक्टर खनालले जानकारी दिए ।
तर महारागञ्जका डिएसपी उमेश लम्साल भने डाक्टरलाई नकुटिएको दाबी गरेका छन । डिएसपी लम्सालले भने, ‘हामीले डाक्टरलाई कुटेका होइनौ । ’
तर उनले उनीहरुलाई लखटेको भने स्विकार गरे । लम्सालले भने, ‘उहाँहरुलाई लखेटेको चाहिँ हो । तर उहाँहरु डाक्टर हो भन्ने थाहा भएन ।’ लठ्ठीको चोट भएको बिषयमा उनले घरभित्र छिर्ने बेलामा ढोका सानो भएकाले चोट लागको हुनसक्ने बताएर आफ्नो गल्ती ढोकछोप गरेका छन । चिकित्सक संघ लगायतका संस्थाहरुले घटनाको विरोध गर्दै कुटपिटमा संलग्न प्रहरीमाथि कारवाही हुनु पर्ने माग गरेका छन ।