प्रसूति गृहको ओपिडी सेवा फेरि सुरु भयो भैसैपाटीबाट

हेल्थ टुडे,
काठमाडौं, १० बैसाख : परोपकार प्रसूति तथा स्त्रीरोग अस्पताल (प्रसूति गृह) ले कोराना भाइरस संक्रमणको त्रासका कारण भैसेपाटीमा बिगत एक महिनादेखि बन्द रहेको ओपिडी सेवा पुन आजदेखि सुरु गरेको छ । भैसेपाटी र आसपास क्षेत्रका महिलालाई ओपिडी सेवाका लागि समेत थापाथलीस्थित प्रसूति गृहमा आउन जान कठिन भए पछि भैसेपाटीमा स्थगित गरेको ओपोडी सेवा पुन सञ्चालन गर्ने निर्णय प्रसूति गृह प्रशासनले गरेको हो । प्रसूति गृहका निर्देशक प्रा.डा.जागेश्वर गौतमले महिलाहरुको स्वास्थ्यलाई सर्वोपरी महत्व दिएर असहज अवस्थामा समेत आजदेखि पुन भैसेपाटीबाट ओपिडी सेवा सञ्चालन गरिएको जानकारी दिए । प्रसूति गृहले बिगत दुई वर्षदेखि भैसेपाटीमा स्त्रीरोग तथा प्रसूति सेवाको ओपिडी सेवा सञ्चालन गर्दै आइरहेको थियो । कोरोना भाइरसका कारण देशमा लकडाउन भएपछि गत चैत ११ गतेदेखि बन्द गरिएको थियो । भैसेपाटीमा प्रसूति सेवा बाहेकका स्त्री, प्रसूति तथा नवजात शिशु सम्बन्धी स्वास्थ्य जाच सहित ओपिडी सेवा लिन सकिने निर्देशक डा.गौतमले जानकारी दिए । थापाथलीमा रहेको प्रसूति गृहले पनि थुप्रै चुनौति मोलेर पनि स्त्री तथा प्रसूति सेवा प्रदान गरिएको डा. गौतम बताउछन । समाजिक दूरी कायम गरेर, मास्कको प्रयोग गरेर, अस्पताल प्रवेश गर्नु पूर्व ज्वरो मापन गरेर र एक एक जना प्रवेश गराएर प्रसूति गृहले सेवालाई निरन्तरता दिएको डा. गौतमको दावी छ । प्रसूति गृह देशकै सबैभन्दा बढी बच्चा जन्मने र स्त्री तथा प्रसूति सेवा प्रदान गर्ने देशकै एकमात्र रिफरल हस्पिटल हो ।