ललितपुर महानगरपालिकाको अनुकरणीय काम, पाटन–जावलाखेल–पुल्चोक धुम्रपान निषेधित क्षेत्र घोषणा

हेल्थ टुडे,
ललितपुर, २० फागुन : ललितपुर महानगरपालिकाले जनताको स्वास्थ्यका दृष्टिले महत्वपूर्ण काम गरेको छ । शुक्रबार महानगरपालिकाले पाटन दरबार क्षेत्र, जावलाखेल र पुल्चोक परिसरलाई धुम्रपान निषेधित क्षेत्र घोषणा गरेको छ । महानगरपालिकाले पाटन दरबार स्क्वाएरमा शुक्रबार आयोजना गरी यी तीन क्षेत्रलाई धुमपान निषेधित क्षेत्र घोषणा गरेको हो । यो घोषणा कार्यन्वयनमा आए यसले जनताको स्वास्थ्यलाई निकै फाइदा हुने स्वास्थ्य विज्ञहरुले बताएका छन् ।

कार्यक्रममा बोल्दै ललितपुर महानगरपालिकाका मेयर चिरिबाबु महर्जनले यो कार्यक्रम दुई वर्षअघि नै शुभारम्भ गर्ने योजना रहेपनि कोरोनाको कारण सफल हुन नसकेको बताए ।

उनले आजबाट लागू हुनेगरी शुरु भएको धुम्रपान निषेधित क्षेत्रमा सुरुवाती सात दिन धुम्रपान नगर्न आग्रह गर्ने र त्यसपछि जरिबाना तिराउने बताए । जरिबानाबाट उठेको रकम क्यान्सर पीडितलाई सहयोग गर्ने प्रतिवद्धता पनि उनले जनाए ।
मेयर महर्जनले भने, ‘स्मोकिङ किल्स भन्ने जुन भनाइ छ यो शतप्रतिशत करेक्ट छ । अहिले हामीले जावलाखेल, पुलचोक र पाटन दरबार स्क्वाएर क्षेत्रमा यो कार्यक्रम लागू गर्न गइरहेका छौँ । हामी यसलाई सफल पारेरै छोड्छौँ । सुरुवाती ७ दिन हामी चुरोट नखानुस् भन्छौँ, त्यसपछि जरिबाना तिराउँछौँ । त्यो जरिवाना क्यान्सर रोगीलाई नै सहयोग गर्नेछौँ ।’ नेपालमा पछिल्ला वर्ष क्यान्सर, दम, स्वासप्रस्वासका लगायत नसर्ने रोगका विरामीको संख्या बढ्दै जानुको प्रमुख कारण धूमपान रहेको विभिन्न अध्ययनहरुले देखाएको छ ।