गेटा मेडिकल कलेज १०० शैयाको अस्पतालबाट सञ्चालन हुने

हेल्थ टुडे,
काठमाडौं, १५ जेठ : कैलालीको गेटामा स्थापना भएको प्रास्तावित दशरथ चन्द्र मेडिकल विश्व विद्यालय अर्थात गेटा मेडिकल कलेजले यसै वर्षदेखि १०० शैयाबाट सेवा सञ्चालन गर्ने भएको छ । अर्थ मन्त्री डा. प्रकाशशरण महतले सोमबार संसदमा बजेट वक्तव्य मार्फत गेटा मेडिकल कलेज यसै वर्षभित्र सञ्चालनमा ल्याइने गरि बजेट बिनियोजन गरेको बताए । डा. महतले यो वर्ष १०० शैयाको अस्पताल सञ्चालन गर्ने गरि जनशक्तिको व्यवस्थापन, उपकरण खरिद लगायतका लागि आवश्यक बजेट विनियोजन गरेको जानकारी दिए । सरकारले गत वर्ष नै गेटा मेडिकल कलेजको कार्यकारी निर्देशकमा डा. प्रमोद जोशीलाई नियुक्त गरिसकेको भए पनि बजेट अभावमा सेवा सञ्चालन हुन सकेको छैन । दुई महिना अगाडि सरकारले गेटा मेडिकल कलेजलाई दशरथचन्द मेडिकल विश्व विद्यालयका रुपमा अगाडि बढाउने सैदान्तिक सहमती दिइसकेको छ ।