स्वास्थ्यको सात वर्षे स्वास्थ्य क्षेत्र रणनीति मन्त्रिपरिषदबाट पास

हेल्थ टुडे,
काठमाडौं, २२ जेठ : सरकारले स्वास्थ्य क्षेत्रको सात वर्षे रणनीति पास गरेको छ। मन्त्रिपरिषदको बैठकले ’नेपाल स्वास्थ्य क्षेत्र–रणनीतिक योजना २०७९/८०–२०८७/८८ पास गरेको हो। मन्त्रिपरिषदबाट रणनीति पास भएसँगै स्वास्थ्यका महत्वपूर्ण कार्यक्रमहरु अगाडि बढ्नुका साथै वैदेशिक सहयोग आउने बाटो खुलेको छ।
मन्त्रिपरिषदमा पेस भएको झण्डै एक वर्षपछि उक्त रणनीति पारित भएको हो। स्वास्थ्य तथा जनसंख्या मन्त्रालयले गत असार २४ गते उक्त रणनीति मन्त्रिपरिषदमा पेश गरेको थियो।
प्रत्येक नागरिकको स्वास्थ्य अवस्थामा सुधार गर्न लक्ष्यसहितको उक्त रणनीतिमा सन् २०३० सम्मका दीगो विकास लक्ष्यहरु पुरा गर्ने विषयमा कार्यक्रम र योजनाहरु रहेका छन्।
यस्ता छन् रणनीतिका मुख्य पाँच उद्देश्य
स्वास्थ्य प्रणालीको कुशलता र उत्तरदायित्व अभिवृद्धि गर्नु
स्वास्थ्यका वृहत निर्धारकहरुलाई सम्बोधन गर्नु
स्वास्थ्यमा दिगो लगानी र सामाजिक सुरक्षा प्रवर्द्धन गर्नु
गुणस्तरीय स्वास्थ्य सेवामा न्यायोचित पहुँच प्रवर्द्धन गर्नु
जनसङ्ख्या र बसाइँ सराइको व्यवस्थापन गर्नु ।
नेपाल स्वास्थ्य क्षेत्र रणनीतिक योजना २०७९/८०–२०८७/८८ नेपाल सरकार मन्त्री परिषदबाट स्वीकृत भएपछि स्वास्थ्य क्षेत्रका दीगो बिकासका लक्ष हासिल गर्न कार्ययोजना बनाइ कार्य गर्न बाटो खुलेको स्वास्थ्य तथा जनसंख्या मन्त्रालयका नीति योजना महासाखा प्रमुख डा.कृष्ण पौडेलले बताए ।