तिलगंगा विश्वविद्यालय विधेयक संसदीय समितिमा पठाउने निर्णय

हेल्थ टुडे,
काठमाडौँ, १५ फागुन : सरकारले तिलगंगा नेत्र विज्ञान प्रतिष्ठान (अस्पताल) लाई विश्वविद्यालयको मान्यता दिने प्रक्रिया अघि बढाएको छ । सोमबार बसेको मन्त्रिपरिषद् बैठकले तिलगंगा विश्वविद्यालय विधेयक संसदीय समितिमा पठाउने निर्णय गरेको छ ।
कृषि तथा पशुपन्छी विकासमन्त्री बेदुराम भुसालले संसदीय समितिमा तिलगंगा विश्वविद्यालय विधेयक पठाउने निर्णय भएको जानकारी दिए । गत जेठमा बसेको मन्त्रिपरिषद् बैठकले शिक्षा, विज्ञान तथा प्रविधि मन्त्रालयलाई विधेयक बनाउने स्वीकृति दिएको थियो ।
मन्त्रालयले मन्त्रिपरिषद्‍मा विधेयक पेश गरेपछि छलपलका लागि संसदीय समितिमा पठाउने निर्णय गरेको थियो । २०४९ असारमा आँखा उपचार केन्द्रको रुपमा स्थापित तिलगंगा हाल प्रतिष्ठानको रूपमा चलिरहेको छ । हाल तिलगंगाले आँखाको उपचार, देश र विदेश आँखा शिविर र अप्रेशनका साथै लेन्स उत्पादन, आँखासम्बन्धी अनुसन्धान गरिरहेको छ ।