स्वास्थ्यले पाएन मन्त्री, स्वास्थ्य मन्त्रीको चर्चामा रहेका गिरी भए कानून मन्त्री

हेल्थ टुडे,
काठमाडौं, २३ फागुन : प्रधानमन्त्री पुष्पकमल दाहालको नेतृत्वमा गठन भएको नयाँ सरकारमा २० वटा मन्त्रालयले आजदेखि नयाँ मन्त्री पाएका छन् । २२ वटा मन्त्रालय मध्ये २० ले आज मन्त्री पाउदा स्वास्थ्य तथा जनसंख्या मन्त्रालयले भने मन्त्री पाउन सकेन । गत वर्ष ४२ दिन स्वास्थ्य मन्त्री भएर विदा भएका एमालेका पदम गिरीले स्वास्थ्य मन्त्रालय पाउने धेरैले अनुमान गरेका थिए । गिरी मंगलबार नै मन्त्री नियुक्त भइसकेको भए पनि उनलाई जिम्मेवारी तोकिएको थिएन । गिरीलाई कानून मन्त्रालय दिइएको छ । बिहीबार गठबन्धनको बैठकले मन्त्रालयको भागवण्डा लगाएपछि स्वास्थ्य मन्त्रालय एमाले, माओवादी र स्वतन्त्र पार्टीको भागमा नपरेको हो । अब बाकी रहेका स्वास्थ्य सहित २ मन्त्रालय जनता समाजबादीको भागमा पर्ने छन् । गठबन्धन दलहरुबिच भएको सहमती अनुसार स्वास्थ्य तथा जनसंख्या मन्त्रालय जनता समाजवादीको भागमा परेको छ । यो मन्त्रालय यसभन्दा पहिले पनि जनता समाजवादीले सम्हालिसकेको छ । यो पार्टीका अध्यक्ष उपेन्द्र यादव केपी ओली नेतृत्वको सरकारमा स्वास्थ्य मन्त्री भइसकेका छन् । प्रधानमन्त्रीको सचिवालयका एक सदस्यका अनुसार स्वास्थ्य मन्त्रालयमा जसपा अध्यक्ष यादवले बलियो दावी रहेको छ । यादवको पाटीर्ले गठबन्धनमा सामेल भए पनि सरकारमा सहभागी हुने मन्त्रीको नाम पठाउन सकेको छैन । उनको पार्टी भित्रै विवाद छ ।